سناسر میں شر پسند عناصر نے گجر طبقے کے ڈھوک کو آگ لگا دی

جموں، 28 فروری (ہ س)۔ ضلع رامبن کے صحت افزا مقام سناسر میں گزشتہ درمیانی شب نامعلوم شرپسند عناصر نے گجر برادری سے تعلق رکھنے والے ایک ڈھوک کو آگ لگا دی، جس کے نتیجے میں ڈھوک مکمل طور پر جل کر خاکستر ہو گیا۔ واقعے کے بعد علاقے میں تشویش کی لہر دوڑ گئی۔

مقامی افراد کے مطابق حالیہ دنوں میں اس علاقے میں گجر طبقے کے کئی ڈھوکوں کو نشانہ بنایا گیا ہے۔ متاثرہ برادری کے افراد نے اس عمل پر شدید دکھ اور غم و غصے کا اظہار کرتے ہوئے الزام لگایا کہ چند عناصر علاقے کا امن خراب کرنے کی منظم کوشش کر رہے ہیں۔ انہوں نے کہا کہ گجر برادری ہر سال کئی مہینوں تک اپنے مویشیوں کے ہمراہ سناسر کے چراگاہی علاقوں میں قیام کرتی ہے اور ایسے واقعات ان کے روزگار اور معمولاتِ زندگی کو متاثر کر رہے ہیں۔

واقعے کی اطلاع ملتے ہی پولیس افسران موقع پر پہنچے اور دیگر پولیس افسران کے ہمراہ حالات کا جائزہ لیا۔ انہوں نے متاثرہ افراد سے ملاقات کر کے انہیں یقین دلایا کہ معاملے کی غیر جانبدارانہ اور مکمل تحقیقات کی جا رہی ہیں۔ایس ایس پی رامبن نے میڈیا سے گفتگو کرتے ہوئے کہا کہ پولیس مختلف زاویوں سے تفتیش کر رہی ہے اور ملوث شرپسند عناصر کو جلد قانون کے کٹہرے میں لایا جائے گا۔ انہوں نے عوام سے اپیل کی کہ وہ صبر و تحمل کا مظاہرہ کریں اور علاقے کے امن و امان کو برقرار رکھنے میں انتظامیہ کا تعاون کریں۔

ہندوستھان سماچار

---------------

ہندوستان سماچار / محمد اصغر