نئی دہلی، 28 فروری (ہ س)۔

دہلی کی پٹیالہ ہاوس کورٹ نے 20 فروری کو بھارت منڈپم میں اے آئی سمٹ میں نیم برہنہ احتجاج کے معاملے میں انڈین یوتھ کانگریس کے قومی صدر ادے بھانو چِب کو ضمانت دے دی ہے۔ ڈیوٹی مجسٹریٹ نے چِب کو 50,000 روپے کے مچلکے پر ضمانت پر رہا کرنے کا حکم دیا۔

عدالت نے چِب کو اپنا پاسپورٹ اور الیکٹرانک گیجٹس کے حوالے کرنے کی ہدایت کی۔ اس کی پولیس حراست کی میعاد ختم ہونے کے بعد، دہلی پولیس نے چب کو جمعہ کی رات دیر گئے ڈیوٹی مجسٹریٹ کی رہائش گاہ پر پیش کیا اور سات دن کی تحویل مانگی۔ چب کی جانب سے ضمانت کی درخواست بھی دائر کی گئی تھی۔ جس کے بعد عدالت نے چب کو ضمانت پر رہا کرنے کا حکم دیا۔

اس سے قبل 24 فروری کو عدالت نے چب کو چار دن کی پولیس حراست میں بھیج دیا تھا۔ دہلی پولیس کے مطابق، چِب نے احتجاج کا انتظام کیا ۔ اس سے پہلے، 21 فروری کو، عدالت نے یوتھ کانگریس کے چار کارکنوں کو پانچ دن کی پولیس حراست میں بھیج دیا تھا۔ چاروں ملزمان کو 20 فروری کی سہ پہر پرگتی میدان کے بھارت منڈپم میں احتجاج کرتے ہوئے گرفتار کیا گیا تھا۔ دہلی پولیس نے جن چار یوتھ کانگریس کارکنوں کو گرفتار کیا ان میں کرشنا ہری، کندن یادو، اجے کمار اور نرسمہا یادو شامل ہیں۔

دہلی پولیس کے مطابق ان کی گرفتاری سے قبل پولیس کے ساتھ ہاتھا پائی ہوئی، جس میں تین پولیس اہلکار زخمی ہوئے۔ مظاہرین نے ابتدائی طور پر کالی چھتریوں اور پرنٹ شدہ اسٹیکرز کے ساتھ اے آئی سمٹ کے مقام میں داخل ہونے کا منصوبہ بنایا تھا لیکن گرفتاری کے خوف سے انہوں نے اپنا منصوبہ تبدیل کر دیا اور پرنٹ شدہ پیغامات والی ٹی شرٹس پہن کر وہاں پہنچے۔ ٹی شرٹس کے اوپر، انہوں نے سویٹر اور جیکٹیں پہن رکھی تھیں۔ بعد ازاں، بھارت منڈپم کے ہال 5 میں پہنچ کر مظاہرین نے اپنی ٹی شرٹس اتار کر ہوا میں لہرانا شروع کر دیں۔

27 فروری کو عدالت نے اس معاملے میں یوتھ کانگریس کے جنرل سکریٹری نگم بھنڈاری کو 24 مارچ تک عبوری ضمانت دے دی۔ 26 فروری کو عدالت نے احتجاج کے سلسلے میں ہماچل پردیش سے گرفتار یوتھ کانگریس کے تین کارکنوں سوربھ، ارباز اور سدھارتھ کو تین دن کے لیے پولس ریمانڈ پر بھیجنے کا حکم دیا۔

ہندوستھان سماچار

ہندوستان سماچار / عطاءاللہ