ممبئی ، 28 فروری (ہ س)۔ بھارت کے تیزی سے پھیلتے ڈیجیٹل ادائیگی نظام میں ایپل انکارپوریٹڈ جلد اپنی سروس ‘ایپل پے’ متعارف کرانے کی تیاری میں ہے اور اطلاعات کے مطابق اس کی باضابطہ شروعات جون۔جولائی 2026 کے دوران ہو سکتی ہے، جس سے آئی فون صارفین کو جدید اور محفوظ پیمنٹ پلیٹ فارم دستیاب ہوگا۔اس وقت گوگل پے، فون پے اور پے ٹی ایم جیسے پلیٹ فارمز مارکیٹ میں مضبوط پوزیشن رکھتے ہیں، لیکن ایپل پے کو رازداری اور سیکورٹی کے لحاظ سے الگ شناخت ملنے کی امید کی جا رہی ہے۔ٹوکنائزیشن ٹیکنالوجی کے تحت ادائیگی کے وقت اصل کارڈ تفصیلات ظاہر نہیں ہوں گی، جس سے دھوکہ دہی کے امکانات کم ہوں گے۔ این ایف سی کی مدد سے دکانوں میں ٹَیپ ٹو پے کے ذریعے فوری ادائیگی ممکن ہوگی جبکہ آن لائن شاپنگ اور موبائل ایپس میں پیمنٹ بھی آسان ہو جائے گی۔ فیس آئی ڈی اور ٹچ آئی ڈی کے ذریعے تصدیق سسٹم کو مزید محفوظ بنایا جائے گا۔ایپل نے سروس کے آغاز کیلئے آئی سی آئی سی آئی بینک، ایچ ڈی ایف سی بینک اور ایکسس بینک سمیت بڑے مالیاتی اداروں اور ویزا و ماسٹر کارڈ نیٹ ورک سے بات چیت شروع کی ہے، جبکہ نیشنل پیمنٹس کارپوریشن آف انڈیا کے ساتھ بھی ابتدائی سطح پر مذاکرات جاری ہیں۔بھارتی قوانین کے تحت ڈیٹا لوکلائزیشن اور یو پی آئی انٹیگریشن ضروری ہونے کی وجہ سے پہلے مرحلے میں کارڈ بیسڈ کانٹیکٹ لیس ادائیگی شروع ہونے کا امکان ہے اور بعد میں یو پی آئی کو شامل کیا جا سکتا ہے۔ ڈیجیٹل ٹرانزیکشن میں مسلسل اضافے کے درمیان ایپل پے کی انٹری مارکیٹ میں مسابقت کو مزید تیز کرے گی اور صارفین کو تیز رفتار اور محفوظ ادائیگی کی سہولت فراہم کرے گی۔

ہندوستھان سماچار

--------------------

ہندوستان سماچار / جاوید این اے