نئی دہلی، 28 فروری (ہ س)۔ دہلی پولیس میٹرو یونٹ نے آزاد پور میٹرو ڈپو میں ہوئی چوری کے معاملے کا انکشاف کرتے ہوئے تین مشتبہ افراد کو گرفتار کیا ہے۔ ملزمان نے میٹرو ڈپو کے احاطے سے سگنلنگ سسٹم میں استعمال ہونے والی تار سمیت دیگر قیمتی سامان چوری کیا تھا۔ پولیس نے ملزمان کے مقام سے تانبے کی تار بھی برآمد کر لی۔

میٹرو پولیس کے ڈپٹی کمشنر کشل پال سنگھ نے ہفتہ کو بتایا کہ 26 فروری کی صبح تقریباً 10 بجے، سی آئی ایس ایف کے اہلکاروں نے ڈپو کے احاطے میں نصب نگرانی کے کیمروں سے ریکارڈنگ کی جانچ کرتے ہوئے ایک مشکوک نوجوان کو انتہائی محفوظ علاقے میں گھومتے ہوئے دیکھا۔ معاملہ مشکوک معلوم ہوا اور مقامی پولیس کو اطلاع دی گئی۔ تفتیش میں انکشاف ہوا کہ ڈپو کے ہاو¿سنگ بلاک سے تقریباً 100 میٹر سگنلنگ تار، 60 میٹر مشین کی وائرنگ، چیک پلیٹیں اور ایک پانی کا میٹر چوری کر لیاگیا ہے۔

اطلاع ملنے پر آزاد پور میٹرو پولیس اسٹیشن میں بھارتیہ نیائے سنہتا کی دفعہ 305/3(5)/331(4) اور ڈی ایم آر سی ایکٹ کی دفعہ 74(1)78/ کے تحت مقدمہ درج کیا گیا۔ اس کے بعد پولیس نے تکنیکی نگرانی کا استعمال کرتے ہوئے تحقیقات کا آغاز کیا۔ ڈپٹی کمشنر آف پولیس کے مطابق، مرکزی ملزم علی احمد (25) جو کہ جہانگیر پوری کا رہائشی تھا، کو تفتیش کے دوران گرفتار کیا گیا۔

پوچھ گچھ کے دوران اس نے اپنے ساتھی سنور (24) کا نام ظاہر کیا۔ پولیس نے اسے بھی گرفتار کرلیا۔ تفتیش اور ایک دن کے پولیس ریمانڈ کے دوران ملزم نے انکشاف کیا کہ مسروقہ سامان ایک مقامی اسکریپ ڈیلر کو فروخت کیا گیا تھا۔ اس کے بعد مسروقہ سامان کی خریداری میں ملوث 66 سالہ بخش حسین کو گرفتار کر لیا گیا۔

ڈپٹی کمشنر آف پولیس کے مطابق ,تینوں ملزمان کی فراہم کردہ معلومات کی بنیاد پر پولیس نے تقریباً 50 میٹر تانبے کی تار برآمد کی ہے۔ باقی سامان کی بازیابی کے لیے کوششیں جاری ہیں۔ پولیس اس بات کی بھی تفتیش کر رہی ہے کہ آیا یہ گینگ میٹرو نیٹ ورک پر ہونے والی دیگر پچھلی چوریوں میں ملوث تھا۔

ہندوستھان سماچار

ہندوستان سماچار / محمد شہزاد