کولکاتا، 27 فروری (ہ س)۔ جمعہ کی سہ پہر بنگال کو ایک بار پھر شدید زلزلہ نے ہلا کر رکھ دیا۔ کولکاتا اور آس پاس کے اضلاع میں تقریباً 1:20 بجے زلزلے کے شدید جھٹکے محسوس کیے گئے۔ اچانک آنے والے زلزلہ سے خوف وہراس پھیل گیا اور لوگ گھروں اور دفاتر سے باہر سڑکوں پر نکل آئے۔ رہائشیوں کا کہنا تھا کہ انھوں نے اس سے پہلے کبھی اتنے شدید جھٹکے محسوس نہیں کیے تھے۔

ابتدائی معلومات کے مطابق ریکٹر اسکیل پر زلزلے کی شدت 4.9 اور 5 کے درمیان تھی۔ متعدد موبائل الرٹس نے پانچ کی شدت کی اطلاع دی۔ بلند و بالا عمارتوں کے مکینوں کو شدید جھٹکوں کا سامنا کرنا پڑا۔ زلزلہ تقریباً ایک منٹ تک جاری رہا۔

ذرائع کے مطابق زلزلہ صرف بنگال تک محدود نہیں تھا بلکہ پڑوسی ملک بنگلہ دیش میں بھی زلزلے کے جھٹکے محسوس کیے گئے۔ کولکاتا میں ریکٹر اسکیل پر 3.6 کی شدت ریکارڈ کی گئی جبکہ بنگلہ دیش میں 5.5 کی شدت ریکارڈ کی گئی۔ ابتدائی اطلاعات کے مطابق زلزلے کا مرکز بنگلہ دیش کے علاقے کھلنا میں تھا۔

مغربی بنگال کے کئی علاقوں بشمول نادیہ، ہگلی، مشرقی اور مغربی مدنی پور، شمالی اور جنوبی 24 پرگنہ اور سندربن میں زلزلے کے شدید جھٹکے محسوس کیے گئے۔

تاہم اس رپورٹ کے لکھے جانے تک سرکاری طور پر کسی جانی یا مالی نقصان کی کوئی اطلاع نہیں ملی ہے۔ انتظامیہ صورتحال پر نظر رکھے ہوئے ہے۔ زلزلے کے بعد کچھ دیر تک خوف وہراس پھیل گیا اور کئی علاقوں میں لوگ احتیاط کے طور پر کھلے مقامات پر کھڑے نظر آئے۔

---------------

ہندوستان سماچار / عبدالسلام صدیقی