منی پور میں مختلف مہموں میں 6 عسکریت پسند گرفتار

امپھال، 27 فروری (ہ س)۔ منی پور کے مختلف علاقوں میں گزشتہ 24 گھنٹے کے دوران چلائی گئی پکڑ دھکڑ مہم کے دوران مختلف عسکریت پسند تنظیموں کے چھ کیڈروں کو گرفتار کیا گیا ہے۔ منی پور پولیس ہیڈکوارٹر کی جانب سے آج جاری سرکاری بیان میں بتایا گیا ہے کہ گزشتہ جمعرات کو سیکورٹی فورسز نے پہلی مہم میں پی آر ای پی اے کے (پریپاک - پی آر او) کے ایک فعال کیڈر تھوکچوم راج سنگھ (25) عرف ایبونگو کو گرفتار کیا ہے۔ اسے امپھال مغربی ضلع کے تحت گھاری علاقے سے گرفتار کیا گیا۔ اس کے پاس سے ایک موبائل فون اور ایک آدھار کارڈ ضبط کیا گیا۔

دوسری مہم میں سیکورٹی فورسز نے کے سی پی (پی ایس سی) کے ایک فعال کیڈر پرتھوی راج موئرنگتھم عرف 3 بی (26) کو گرفتار کیا۔ اسے پولیس نے امپھال مشرقی ضلع کے اریلبونگ تھانہ کے تحت اس کی رہائش گاہ سے گرفتار کیا۔

تیسری مہم میں سیکورٹی فورسز نے آر پی ایف/پی ایل اے کے دو کیڈروں کو امپھال مشرقی ضلع کے یائنگنگپوگپی تھانہ کے تحت یائنگنگپوگپی علاقے سے گرفتار کیا۔ ان کی شناخت تھنگوم مہینجیت سنگھ عرف اناو (22) اور نگانگبام ڈیرک سنگھ (20) کے طور پر کی گئی ہے۔ ان کے قبضے سے ایک نمبر 36 ہینڈ گرینیڈ، ایک ڈیٹونیٹر، مختلف کیلیبر کے 10 زندہ راونڈ کارتوس اور دو موبائل فون برآمد کیے گئے۔

چوتھی مہم میں سیکورٹی فورسز نے جبری وصولی کرنے والے، آر پی ایف/پی ایل اے کے فعال کیڈر موئرنگتھم جینسن سنگھ عرف اہینبا عرف ناوبی (26) کو گرفتار کیا۔ اسے امپھال مشرقی ضلع کے ہینگنگ تھانہ کے تحت علاقے سے گرفتار کیا گیا۔ اس کے پاس سے آر پی ایف/پی ایل اے فاونڈیشن ڈے کے تین بینر اور دو موبائل فون برآمد کیے گئے۔

پانچویں مہم میں سیکورٹی فورسز نے آر پی ایف/پی ایل اے کے ایک فعال کیڈر لونگجام یائیفابا اینگوم عرف ناناو (30) کو گرفتار کیا۔ اسے امپھال مغربی ضلع کے واہنگ خومان علاقے سے گرفتار کیا۔ اس کے پاس سے دو موبائل فون ضبط کیے گئے۔

پولیس گرفتار عسکریت پسندوں سے مسلسل پوچھ گچھ کر کے مزید کارروائی میں مصروف ہے۔

ہندوستھان سماچار

---------------

ہندوستان سماچار / انظر حسن