بیتیا،27فروری(ہ س)۔ بہار کے بیتیا میں ایک بڑا حادثہ اس وقت پیش آیا جب جمعرات کی دوپہر لوریہ نگر پنچایت علاقہ میں یونین بینک کے سامنے گوشت کی دکان میں ایک چھوٹے سے کھانا پکانے والے گیس سلنڈر میں اچانک آگ لگ گئی اور وہ پھٹ گیا۔ واقعے میں دکاندار قریبی صارفین اور مسافروں سمیت مجموعی طور پر 11 افراد جھلس گئے۔ دھماکے سے بازار میں خوف وہراس پھیل گیا اور جائے وقوعہ پر لوگوں کی بھیڑ جمع ہوگئی۔مقامی باشندوں اور پولیس کی بروقت کارروائی سے تمام زخمیوں کو فوری طور پر لوریہ کے کمیونٹی ہیلتھ سینٹر پہنچایا گیا۔ انچارج میڈیکل افسر ڈاکٹر روشن کمار نے بتایا کہ ابتدائی طبی امداد کے بعد سبھی کو مزید علاج کے لیے جی ایم سی ایچ بیتیا ریفر کردیا گیا۔زخمیوں میں گووند رائے (34)، ونے کمار شکلا (32)، گلاب پٹیل، پریم ناتھ کمار (25)، امرجیت کمار (30)، نتیش کمار (25)، کرشنا ٹھاکر (35)، بھول دیوی (35)، بیبی کماری (5)، سیتا دیوی اور ایک اور چھ سالہ بچی شامل ہیں۔ ان سب کی طبی نگرانی جاری ہے۔واقعہ کی اطلاع ملتے ہی چیئرمین کے نمائندے سنجے کمار، سی او نتیش کمار سیٹھ، تھانہ انچارج رمیش کمار شرما سمیت کئی عوامی نمائندے حالات معلوم کرنے اسپتال پہنچے۔ تھانہ انچارج رمیش کمار نے بتایا کہ سلنڈر میں آگ لگنے کی وجہ کی جانچ کی جا رہی ہے۔
ہندوستھان سماچار
ہندوستان سماچار / Mohammad Afzal Hassan
