جی ایم سی راجوری کو پی جی کالج کا درجہ دیا گیا
جموں، 27 فروری (ہ س)۔ پیر پنجال خطے میں طبی تعلیم کے شعبے کو بڑا فروغ ملا ہے۔ گورنمنٹ میڈیکل کالج راجوری کو پوسٹ گریجویٹ درجہ دے دیا گیا ہے جس کے بعد ادارہ پہلی مرتبہ اعلیٰ طبی کورسز شروع کرے گا۔ نیشنل میڈیکل کمیشن نے موجودہ تعلیمی سیشن کے لیے ایم ڈی اطفال (پیڈیاٹرکس) کی چار نشستوں کی منظوری دی ہے۔
حکام کے مطابق شعبۂ اطفال میں اہل پروفیسر کی دستیابی کے بعد کالج اس کورس کے اجرا کا مستحق قرار پایا۔ گزشتہ سال ہونے والی تفصیلی جانچ کے بعد چاروں نشستیں منظور کی گئیں۔تعلیمی کارکردگی کے حوالے سے بھی کالج نے نمایاں کامیابی حاصل کی ہے۔ جموں یونیورسٹی کی جانب سے جاری نتائج کے مطابق ایم بی بی ایس کے پہلے بیچ اور دوسرے سال کے طلبہ کا نتیجہ سو فیصد رہا۔ مسلسل تیسرے سال سو فیصد کامیابی حاصل کرتے ہوئے کسی بھی طالب علم کو ناکامی کا سامنا نہیں کرنا پڑا۔
کالج میں ہر سال ایم بی بی ایس کی 100 نشستوں پر داخلہ دیا جاتا ہے جبکہ 2026-27 کے تعلیمی سیشن کے لیے نشستوں کی تعداد بڑھا کر 150 کرنے کی تجویز بھیجی گئی ہے جس کی منظوری کا انتظار ہے۔بی ایس سی نرسنگ میں سالانہ 60 طلبہ داخلہ لیتے ہیں جبکہ پیرا میڈیکل کورسز میں بھی مختلف شعبوں کے لیے نشستیں مختص ہیں۔ اس کے علاوہ ڈی این بی کے نو شعبہ جات میں بھی کورسز جاری ہیں۔ ادارے میں بنیادی ڈھانچے کو مزید مضبوط بنایا گیا ہے۔
جدید لیبارٹریاں قائم کی گئی ہیں، فیکلٹی میں اضافہ ہوا ہے اور طلبہ کے لیے بہتر طبی تربیت کی سہولت فراہم کی جا رہی ہے۔ نئے ہاسٹل بھی تعمیر کیے گئے ہیں تاکہ انٹرنز اور رہائشی ڈاکٹروں کو قیام کی بہتر سہولت میسر ہو سکے۔ پوسٹ گریجویٹ درجہ ملنے سے راجوری اور ملحقہ علاقوں میں ماہر ڈاکٹروں کی دستیابی بڑھے گی اور مقامی طلبہ کو اعلیٰ طبی تعلیم کے لیے باہر جانے کی ضرورت کم ہو گی۔
ہندوستھان سماچار
---------------
ہندوستان سماچار / محمد اصغر
