جموں, 27 فروری (ہ س)۔
انسدادِ بدعنوانی بیورو نے غیر قانونی کانکنی کے خلاف بڑی کارروائی کرتے ہوئے مسلسل دو روز تک ضلع اُدھم پور اور ضلع ریاسی میں متعدد اسٹون کریشر یونٹس پر مشترکہ اچانک جانچ کی۔
یہ اقدام جموں خطے کے مختلف علاقوں میں معدنیات کی بڑے پیمانے پر غیر قانونی نکاسی کی شکایات موصول ہونے کے بعد کیا گیا۔ ابتدائی اطلاعات میں بعض معدنی ٹھیکہ داروں اور محکمہ کانکنی و ماحولیات کے چند اہلکاروں کے درمیان مبینہ گٹھ جوڑ کی نشاندہی کی گئی تھی، جس کے سبب غیر قانونی سرگرمیاں بغیر روک ٹوک جاری تھیں۔
بیورو کی ٹیموں نے دونوں اضلاع کے مختلف مقامات پر بیک وقت چھاپے مارے۔ کارروائی کے دوران کئی برقی آلات، اہم سرکاری ریکارڈ اور قابلِ اعتراض دستاویزات ضبط کی گئیں۔ تفتیشی عملے نے معدنیات کی ترسیل کے لیے استعمال ہونے والے مبینہ طور پر جعلی نقل و حمل اجازت نامے بھی برآمد کیے۔
حکام کے مطابق جانچ کیے گئے تمام یونٹس غیر قانونی کانکنی میں ملوث پائے گئے اور مقررہ ضوابط و شرائط کی خلاف ورزی کرتے ہوئے کام کر رہے تھے۔ ان خلاف ورزیوں کے باعث علاقے میں سنگین ماحولیاتی نقصان پہنچا ہے۔
انسدادِ بدعنوانی بیورو نے معاملے کی مزید چھان بین شروع کر دی ہے تاکہ ملوث افراد کے کردار کا تعین کیا جا سکے اور ضبط شدہ ریکارڈ کی مکمل جانچ کی جا سکے۔ بیورو نے واضح کیا ہے کہ بدعنوانی اور قدرتی وسائل کے غیر قانونی استحصال میں ملوث عناصر کے خلاف سخت کارروائی جاری رکھی جائے گی۔
ہندوستھان سماچار
---------------
ہندوستان سماچار / محمد اصغر
