جموں, 24 فروری (ہ س)۔ انڈین ریلوے کی جانب سے جموں سے سری نگر کے درمیان براہِ راست وندے بھارت ایکسپریس چلانے کی تیاریوں کو حتمی شکل دی جا رہی ہے۔ اسی سلسلے میں آج جموں اور شری ماتا ویشنو دیوی کٹرا ریلوے اسٹیشن کے درمیان 20 کوچز پر مشتمل خصوصی وندے بھارت ٹرین کا ٹرائل رن کیا جا رہا ہے۔ریلوے حکام کے مطابق اس آزمائشی دوڑ کا مقصد ٹرین کو باقاعدہ سروس میں شامل کرنے سے قبل تکنیکی اور آپریشنل پہلوؤں کا جائزہ لینا ہے۔ ٹرائل کامیاب رہنے کی صورت میں ریلوے بورڈ سے منظوری کے بعد اس ٹرین کو جموں سے سری نگر کے درمیان باقاعدگی سے چلایا جائے گا، جس سے جموں شہر براہِ راست وادی کشمیر سے جدید سیمی ہائی اسپیڈ ریل سروس کے ذریعے منسلک ہو جائے گا۔

حکام نے بتایا کہ 20 کوچز پر مشتمل خصوصی ریک جموں پہنچ چکا ہے اور پلیٹ فارم، دیکھ بھال اور آپریشن سے متعلق انتظامات مکمل کر لیے گئے ہیں۔ اس نئی سروس سے مسافروں کو تیز، محفوظ اور آرام دہ سفر کی سہولت میسر آئے گی، جبکہ سیاحت اور تجارتی سرگرمیوں کو بھی فروغ ملنے کی توقع ہے۔ریلوے کے مطابق جموں و کشمیر کے موسمی اور جغرافیائی حالات کو مدنظر رکھتے ہوئے اس خصوصی وندے بھارت میں اسنو کٹر، جدید ہیٹنگ سسٹم، درجہ حرارت کنٹرول نظام، جدید بریکنگ سسٹم اور اینٹی اسکیڈ ٹیکنالوجی جیسی سہولیات فراہم کی گئی ہیں، تاکہ برف باری اور پہاڑی راستوں پر بھی محفوظ آپریشن یقینی بنایا جا سکے۔

ہندوستھان سماچار

---------------

ہندوستان سماچار / محمد اصغر