دوحہ، 21 فروری (ہ س)۔ قطر اوپن ٹینس ٹورنامنٹ میں ورلڈ نمبر 1 اسپین کے کارلوس الکاراز نے جمعہ کی رات دفاعی چیمپئن آندرے روبلیو کو 6-7(3)، 4-6 سے ہرا کر فائنل میں داخلہ حاصل کر لیا۔ سال 2026 میں الکاراز کی یہ لگاتار 11ویں جیت ہے۔ گزشتہ 13 ٹورنامنٹس میں یہ ان کا 12واں فائنل ہے، جو ان کے تسلسل اور شاندار فارم کو ظاہر کرتا ہے۔
پہلے سیٹ میں روبلیو نے سخت ٹکر دی۔ 3-0 سے پچھڑنے کے بعد انہوں نے مقابلے کو ٹائی بریک تک پہنچایا، لیکن بیک ہینڈ پر کی گئیں 14 ان فورسڈ غلطیاں ان کے لیے نقصان دہ ثابت ہوئیں۔ ٹائی بریک میں الکاراز نے تحمل برقرار رکھا اور 3-6 کی برتری حاصل کی۔ اسی دوران مایوس روبلیو نے غصے میں اپنا ریکٹ گھٹنے پر مار دیا، جس سے اس کی اسٹرنگ بھی ٹوٹ گئی۔ بالآخر الکاراز نے شاندار فور ہینڈ کے ساتھ پہلا سیٹ اپنے نام کر لیا۔
دوسرے سیٹ میں الکاراز نے دو بار سروس بریک کر کے 3-5 کی برتری بنائی اور میچ جیتنے کے لیے سرو کر رہے تھے۔ حالانکہ روبلیو نے تین میچ پوائنٹ بچاتے ہوئے واپسی کی کوشش کی، لیکن الکاراز نے اگلے ہی گیم میں پھر بریک حاصل کر لیا۔ چھٹے میچ پوائنٹ پر روبلیو کا بیک ہینڈ باہر چلا گیا اور الکاراز نے مقابلہ اپنے نام کر لیا۔
22 سالہ الکاراز نے میچ کے بعد کہا کہ انہیں اپنی صلاحیتوں پر پورا بھروسہ ہے اور ہر مقابلے میں بہتر بننے کی کوشش ہی ان کی کامیابی کی بنیاد ہے۔ حال ہی کے چار گرینڈ سلیم میں وہ فائنل تک پہنچے ہیں اور ان میں سے تین خطاب جیت چکے ہیں۔
دوسرے سیمی فائنل میں جاکوب مینسک کا سامنا آرتھر فلس سے ہوگا۔ اب سبھی کی نگاہیں فائنل مقابلے پر ٹکی ہیں، جہاں الکاراز خطاب جیتنے کے ارادے سے اتریں گے۔
ہندوستھان سماچار
---------------
ہندوستان سماچار / انظر حسن
