نئی دہلی، 9 جنوری (ہ س):۔ حکومت نے نجی مواد کے تخلیق کاروں کو اپنی ڈیجیٹل تخلیقات کو دوردرشن، آل انڈیا ریڈیو، اور ویوز او ٹی ٹی پلیٹ فارم پر نشر کرنے اور اس سے پیدا ہونے والی آمدنی میں سے 90 فیصدی تخلیق کاروں کو دینے کی تجویز پیش کی ہے ۔

رائلز، انفارمیشن براڈکاسٹنگ، الیکٹرانکس اور انفارمیشن ٹکنالوجی کے وزیر اشونی ویشنو نے جمعہ کو پرسار بھارتی پلیٹ فارم کے لیے کریئٹرز کارنر کے آغاز کے موقع پر صحافیوں سے بات کرتے ہوئے یہ بات کہی۔

اس موقع پر اطلاعات و نشریات اور پارلیمانی امور کے وزیر مملکت ایل مروگن، اطلاعات و نشریات کے سکریٹری سنجے جاجو اور پرسار بھارتی کے چیف ایگزیکٹیو آفیسر گورو دویدی بھی موجود تھے۔

ایک سوال کے جواب میں ویشنو نے کہا کہ پرسار بھارتی کے پلیٹ فارمز کے لیے مواد کا انتخاب کرنے کے لیے مختلف شعبوں کے تجربہ کار افراد پر مشتمل ایک ٹیم تشکیل دی جائے گی۔

انہوں نے کہا کہ ریونیو شیئرنگ کا منفرد ماڈل تیار کیا گیا ہے۔ دوردرشن، آل انڈیا ریڈیو، اور ویوز او ٹی ٹی پلیٹ فارم پر ان کی ڈیجیٹل تخلیقات کی نشریات سے حاصل ہونے والی آمدنی کا تقریباً 90% تخلیق کاروں کو دیا جائے گا، جب کہ پرسار بھارتی صرف 10% لے گی۔ انہوں نے کہا کہ پہلی بار مواد تخلیق کرنے والوں کو ٹیلی ویژن چینل پر اپنی ڈیجیٹل تخلیقات نشر کرنے کا موقع ملے گا۔ اس سے تقریباً 80 ملین کنٹینٹ کریٹرز کے لیے مواقع کھلیں گے۔

ویشنو نے بتایا کہ فی الحال، ویوز او ٹی ٹی پلیٹ فارم پر 250 سے زیادہ ٹی وی اور ایف ایم ریڈیو چینلز دستیاب ہیں۔ انہوں نے کہا کہ وہ ٹیلی ویژن مینوفیکچررز پر زور دیتے ہیں کہ وہ اپنے ٹی وی سیٹس میں ویوز او ٹی ٹی کو ضم کریں اور اسے مارکیٹ میں لے آئیں۔

ویشنو نے بتایا کہ کریٹرز کارنر کے حوالے سے اشتہاری کمپنیوں سے بھی بات چیت ہوئی ہے۔ انہوں نے کہا کہ ان کا خیال ہے کہ مواد تخلیق کرنے والوں کو مناسب مواقع اور مناسب آمدنی ملنی چاہیے۔

انہوں نے سوشل میڈیا پلیٹ فارمز پر بعض نظریات کو فروغ دینے اور دوسروں کی حوصلہ شکنی کے رجحان پر ناراضگی کا اظہار کیا اور مقامی پلیٹ فارمز کی ضرورت پر زور دیا۔ انہوں نے کہا کہ اگر کوئی ہندوستانی پلیٹ فارم ایکس، فیس بک یا انسٹاگرام سامنے آتا ہے تو وہ مکمل تعاون فراہم کرنے کے لیے تیار ہیں۔

کریٹرز کارنر کی تفصیل دیتے ہوئے، انہوں نے کہا کہ ڈیجیٹل مواد کے تخلیق کاروں کو پہچاننے اور اسے فروغ دینے کے وزیر اعظم نریندر مودی کے وزن کے مطابق، پرسار بھارتی نے ڈی ڈی نیوز پر ملک بھر میں ڈیجیٹل تخلیق کاروں کے ذریعہ تخلیق کردہ مواد کی نمائش کے لیے کریٹرز کارنر کا آغاز کیا ہے۔ اس اقدام کا مقصد پرسار بھارتی اور انفرادی مواد تخلیق کاروں کے درمیان شراکت داری کے ذریعے معیاری مواد کی تخلیق کی حوصلہ افزائی اور اپنی رسائی کو بڑھا کر ڈیجیٹل معیشت کو فروغ دینا ہے۔

انہوں نے وضاحت کی کہ کریٹرز کارنر میں خبروں اور حالات حاضرہ، ثقافت، سفر، خوراک، آرٹ اور ادب، موسیقی اور رقص، صحت اور تندرستی، تعلیم، سائنس اور ٹیکنالوجی، متاثر کن کہانیاں، ماحولیات اور پائیدار ترقی، اور تفریح سمیت مختلف موضوعات پر مواد پیش کیا جائے گا۔

پرسار بھارتی حکام کے مطابق، یہ پروگرام پیر سے جمعہ شام 7:00 بجے ڈی ڈی نیوز پر نشر کیا جائے گا، اگلے دن صبح 9:30 بجے دہرایا جائے گا۔ ہر ایپیسوڈ میں چار سے چھ ریلز یا ویڈیوز شامل ہوں گے جن میں موضوعات کی ایک وسیع رینج شامل ہے۔ یہ اقدام باہمی طور پر فائدہ مند شراکت داری ہوگی جو ڈیجیٹل تخلیق کاروں کو ایک قابل اعتماد پلیٹ فارم اور پرسار بھارتی/ڈی ڈی نیوز کی وسیع رسائی فراہم کرے گی تاکہ وہ اپنے کام کو پیش کر سکیں، جبکہ پرسار بھارتی اختراعی اور متنوع مواد کو تیار کرنے کے قابل بنے گی ۔

ہندوستھان سماچار

ہندوستان سماچار / عطاءاللہ