علی گڑھ, 08 جنوری (ہ س)۔

علی گڑھ مسلم یونیورسٹی کے ویمنس کالج میں شعبہ ہندی کی ایسوسی ایٹ پروفیسر ڈاکٹر نازش بیگم کو خواتین کی تعلیم، تعلیمی قیادت اور سماجی بیداری کے میدان میں نمایاں خدمات کے اعتراف میں ایک پروقار تقریب کے دوران سپریم کورٹ کے سابق جج جسٹس مارکنڈے کاٹجو نے اعزاز سے نوازا۔

یہ اعزاز نئی دہلی میں راؤز ایونیو کورٹ کے نزدیک ایچ کے ایس سرجیت ہال میں کریئیٹیو فاؤنڈیشن کے زیر اہتمام ایک سیمینار میں عطا کیا گیا، جو معروف سماجی مصلحین ساوتری بائی پھولے اور فاطمہ شیخ کے یوم پیدائش کے موقع پر منعقد ہوا تھا۔

اس موقع پر ڈاکٹر نازش بیگم نے لڑکیوں کی تعلیم کے فروغ میں فاطمہ شیخ کے اہم کردار کو اجاگر کیا۔ انہوں نے کہا کہ فاطمہ شیخ نے ساوتری بائی پھولے کے ساتھ مل کر اپنے ہی گھر میں ایک اسکول قائم کیا، جو خواتین کی تعلیم کے فروغ کی تاریخ میں ایک سنگ میل کی حیثیت رکھتا ہے۔ ڈاکٹر بیگم نے اس بات پر زور دیا کہ جب بھی ساوتری بائی پھولے کی خدمات کو یاد کیا جائے تو فاطمہ شیخ کی جدوجہد اور خدمات کو بھی مساوی طور پر تسلیم کیا جانا چاہیے، کیونکہ دونوں نے مل کر ہندوستان میں خواتین کی تعلیم کی مضبوط اور پائیدار بنیاد رکھی تھی۔

---------------

ہندوستان سماچار / سید کامران علی گڑھ