علی گڑھ, 08 جنوری (ہ س)۔

کینسر کی تشخیص اور علاج کے میدان میں ایک اہم پیش رفت کے طور پر،جواہر لعل نہرو میڈیکل کالج (جے این ایم سی)، علی گڑھ مسلم یونیورسٹی (اے ایم یو) کے شعبہ ریڈئیشن آنکولوجی کو اے ایم یو کے سابق طالب علم ڈاکٹر شمس اقبال (ایم بی بی ایس، 1997 بیچ)، کنسلٹنٹ انٹروینشنل ریڈیولوجسٹ، ہارورڈ میساچوسٹس جنرل ہاسپٹل، امریکہ کی جانب سے جدید ترین کلر ڈوپلر ٹکنالوجی سے لیس ایک اعلیٰ درجے کا الٹراساؤنڈ سسٹم عطیہ کیا گیا ہے جو یونیورسٹی اور سابق طلبہ کے مابین مضبوط اور دیرینہ تعلق کا مظہر ہے۔

اس جدید الٹراساؤنڈ نظام سے جے این ایم سی میں کینسر کے علاج میں انقلابی تبدیلی کی توقع ہے۔ ہائی ریزولوشن اور ریئل ٹائم امیجنگ کی صلاحیت سے آراستہ یہ مشین امیج گائیڈڈ بریکی تھیرپی میں خاص طور پر پروسٹیٹ اور سروائیکل کینسر سمیت دیگر سالِڈ سوفٹ ٹیشو ٹیومرز کی شناخت اور علاج میں بے حد کارگر رہے گی۔ ریڈیو ایکٹیو سیڈز اور بیڈز کی درست تنصیب کے ذریعے یہ ٹکنالوجی علاج کے بہتر نتائج، خطرات میں کمی اور مریضوں کی سلامتی میں اضافے کا باعث بنے گی۔

الٹراساؤنڈ نظام کے افتتاح کے موقع پر اے ایم یو کی وائس چانسلر پروفیسر نعیمہ خاتون نے ڈاکٹر شمس اقبال کے اس قیمتی عطیہ کو سراہتے ہوئے اسے ادارے کی ترقی کے لئے سابق طلبہ کی وابستگی کی درخشاں مثال قرار دیا۔ انہوں نے کہا ”یہ ہمارے سابق طلبہ کے اس گہرے احساسِ تشکر اور ذمہ داری کی عکاسی کرتا ہے جو وہ اپنی مادرِ علمی کے تئیں رکھتے ہیں۔ اس طرح کے اقدامات نہ صرف ہمارے طبی ڈھانچے کو مضبوط بناتے ہیں بلکہ دنیا بھر میں موجود دیگر سابق طلبہ کو بھی اے ایم یو کی تعلیمی و طبی ترقی میں فعال کردار ادا کرنے کی ترغیب دیتے ہیں“۔

اس موقع پراپنے خطاب میں ڈاکٹر شمس اقبال نے اپنی مادر علمی کی خدمت پر فخر کا اظہار کیا جس نے ان کے طبی کریئر کی بنیاد رکھی۔ انہوں نے الٹراساؤنڈ نظام کے طبی استعمال کا عملی مظاہرہ بھی کیا اور موجودہ دور کے آنکولوجیکل پریکٹیسیز اور درستگی پر مبنی کینسر علاج میں اس کے کردار کو اجاگر کیا۔

شعبہ ریڈئیشن آنکولوجی کے چیئرمین پروفیسر محمد اکرم نے عطیہ دہندہ کا شکریہ ادا کرتے ہوئے کہا کہ سابق طلبہ کی سرپرستی پر مبنی اقدامات جے این میڈیکل کالج میں کینسر کی نگہداشت کی خدمات کو بلند کرنے میں نہایت اہم ہیں۔ انہوں نے امید ظاہر کی کہ اس سے ادارہ ایک جامع کینسر مرکز کے طور پر علاحدہ شناخت حاصل کرے گا۔

پروگرام میں فیکلٹی آف میڈیسن کے ڈین پروفیسر محمد خالد، جے این ایم سی ایچ کے میڈیکل سپرنٹنڈنٹ پروفیسر نیر آصف، ایڈیشنل میڈیکل سپرنٹنڈنٹ ڈاکٹر ضیاء صدیقی، شعبہ ریڈیولوجی کے چیئرمین پروفیسر مہتاب احمد، ڈاکٹر سیف اللہ خالد، ڈاکٹر محمد شہاب عالم، ڈاکٹر سمرین ظہیر، مسٹر وی اے ایم انصاری، شعبہ ریڈئیشن آنکولوجی اور دیگر شعبہ جات کے اساتذہ، منتظمین اور عملے کے اراکین موجود تھے۔

---------------

ہندوستان سماچار / سید کامران علی گڑھ