نئی دہلی، 06 جنوری (ہ س)۔ امریکہ اور وینزویلا کے درمیان کشیدگی کے باعث گھریلو صرافہ بازار میں چاندی کی قیمت میں اضافے کا رجحان دیکھا جا رہا ہے۔ یہ چمکدار دھات آج ملک کے بیشتر صرافہ بازاروں میں 1100 روپے فی کلو گرام تک مہنگی ہو گئی ہے۔ چنئی اور حیدرآباد میں اس چمکدار دھات کی قیمت نے 9200 روپے فی کلو گرام تک چھلانگ لگائی ہے۔ قیمت میں اس اضافے کے بعد آج چاندی ملک کی مختلف صرافہ بازاروں میں 247900 روپے فی کلو گرام سے لے کر 266100 روپے فی کلو گرام تک فروخت ہو رہی ہے۔

دہلی میں چاندی کی قیمت آج 1100 روپے بڑھ کر 248100 روپے فی کلو ہوگئی۔ اسی طرح ممبئی، احمد آباد اور کولکاتا میں چاندی 247900 روپے پرکاروبار کر رہی ہے۔ جے پور، سورت اور پونے میں چاندی کی قیمت 248200 روپے فی کلوگرام پر برقرار ہے۔ چاندی بنگلورو میں 248400 روپے اور پٹنہ اور بھونیشور میں 248000 روپے فی کلو پر ٹریڈ کر رہی ہے۔

اس کے علاوہ حیدرآباد میں چاندی کی قیمت 9200 روپئے بڑھ کر 266000 روپئے فی کلوگرام ہوگئی۔ ملک میں چاندی کی سب سے زیادہ قیمت چنئی میں برقرار ہے، جہاں چمکدار دھات ₹9200 بڑھ کر ₹266100 فی کلوگرام تک پہنچ گئی۔ گزشتہ دس دنوں کے دوران چاندی کی قیمتوں میں تیزی سے اتار چڑھاؤ آیا ہے۔ 28 دسمبر کو، چنئی میں چاندی کی قیمت 275000 روپے فی کلوگرام کی چوٹی پر پہنچ گئی۔ تاہم، اس بلندی تک پہنچنے کے بعد، منافع وصولی کی وجہ سے گزشتہ ہفتے 20000 روپے فی کلو گرام سے 255000 روپے تک گر گئے۔ تاہم وینزویلا کے بحران کی وجہ سے چاندی کی قیمتوں میں ایک بار پھر اضافہ ہوا ہے۔

ٹی این وی فائنانشیل سروسز کے سی ای او تارکیشور ناتھ ویشنو کا کہنا ہے کہ امریکہ اور وینزویلا کے درمیان کشیدگی کے باعث بین الاقوامی مارکیٹ میں سونے اور چاندی میں سرمایہ کاروں کی دلچسپی میں نمایاں اضافہ ہوا ہے۔ سرمایہ کاروں نے محفوظ سرمایہ کاری کے طور پر سونے اور چاندی کی خریداری میں اضافہ کیا ہے۔ اس کے ساتھ ہی ، گزشتہ دو دنوں کے دوران لندن سلور مارکیٹ میں چاندی کی سپلائی میں تقریباً 30 فیصد کمی آئی ہے۔ اس کے نتیجے میں عالمی منڈی میں چاندی کی قیمت 78.74 ڈالر فی اونس تک پہنچ گئی ہے۔ ماہرین کا کہنا ہے کہ اگر امریکہ اور وینزویلا کے درمیان کشیدگی جلد حل نہ ہوئی تو بین الاقوامی مارکیٹ میں چاندی کی قیمت 90 سے 95 ڈالر فی اونس تک پہنچ سکتی ہے جس کا اثر ہندوستانی مارکیٹ پر بھی پڑ سکتا ہے۔

ہندوستھان سماچار

ہندوستان سماچار / محمد شہزاد