لداخ , 05 جنوری (ہ س)۔ مرکز کے زیر انتظام علاقے لیہہ میں برفباری کے باعث انڈیگو ایئرلائنز نے مسافروں کے لیے سفری ایڈوائزری جاری کرتے ہوئے بتایا ہے کہ خراب موسمی حالات کے سبب لیہہ ہوائی اڈے پر تمام ٹیک آف اور لینڈنگ عارضی طور پر معطل کر دی گئی ہے۔ایئرلائن کے مطابق نامساعد موسم کی وجہ سے پروازوں کی آمد و رفت روک دی گئی ہے، جس کے باعث مسافروں کو طیاروں کے اندر اور ہوائی اڈے پر طویل انتظار کا سامنا کرنا پڑ سکتا ہے۔ انڈیگو نے واضح کیا ہے کہ اجازت ملتے ہی پروازوں کی روانگی کو تیز تر بنانے کے لیے متاثرہ پروازوں کے بورڈنگ عمل کی تکمیل پیشگی طور پر کی جا سکتی ہے۔

انڈیگو نے اپنے سرکاری بیان میں کہا کہ تاخیر مسافروں کے لیے باعثِ زحمت ہو سکتی ہے، تاہم ایئرلائن کی ٹیم مسافروں کو ہر ممکن سہولت فراہم کرنے کے لیے پوری طرح متحرک ہے۔

ایئرلائن نے مزید کہا کہ موسمی صورتحال پر مسلسل نظر رکھی جا رہی ہے اور حالات بہتر ہوتے ہی پروازوں کی بحالی عمل میں لائی جائے گی۔ مسافروں کو ہدایت دی گئی ہے کہ ہوائی اڈے روانہ ہونے سے قبل انڈیگو کی ویب سائٹ یا موبائل ایپ کے ذریعے اپنی پروازوں کی تازہ صورتحال معلوم کریں۔

جن مسافروں کے سفری منصوبے متاثر ہوئے ہیں، ان کے لیے متبادل پروازوں پر ری بُکنگ یا ایئرلائن پالیسی کے مطابق رقم کی واپسی کی سہولت فراہم کی جا رہی ہے۔ پروازوں سے متعلق اگلی اپ ڈیٹ بعد میں جاری کیے جانے کا امکان ہے۔

ہندوستھان سماچار

ہندوستان سماچار / محمد اصغر