ڈھاکہ، 4 جنوری (ہ س) ۔بنگلہ دیش نے یہ مطالبہ کرنے کا فیصلہ کیا ہے کہ اگلے ماہ ہونے والے آئی سی سی مینز ٹی 20 ورلڈ کپ میں اس کے میچ ہندوستان سے باہر کھیلے جائیں۔ یہ فیصلہ تیز گیندباز مستفیض الرحمان کے انڈین پریمیئر لیگ (آئی پی ایل) سے باہر کیے جانے کے بعد سامنے آیا ہے۔ بنگلہ دیش چاہتا ہے کہ اس کے ورلڈ کپ کے تمام میچز سری لنکا میں ہوں۔ بنگلہ دیش کی عبوری حکومت کے نوجوانوں اور کھیلوں کے مشیر آصف نذرول نے اتوار کو سرکاری خبر رساں ایجنسی بی ایس ایس کے حوالے سے بتایا کہ’ہم بنگلہ دیشی کرکٹ، کرکٹرز اور ملک کی کسی بھی قسم کی بے عزتی برداشت نہیں کریں گے۔ غلامی کے دن ختم ہو چکے ہیں۔‘ہفتے کے روز، کولکاتا نائٹ رائیڈرز (کے کے آر) نے مستفیض الرحمان کو اپنی ٹیم سے ریلیزکردیا ہے۔ یہ مبینہ طور پر ہندوستان اور بنگلہ دیش کے درمیان بڑھتے ہوئے تناو¿ کی روشنی میں بھارتی کرکٹ کنٹرول بورڈ(بی سی سی آئی) کے’مشورے‘ کے بعد کیا گیا ہے۔

آصف نذرل نے کہا کہ انہوں نے بنگلہ دیش کرکٹ بورڈ (بی سی بی) کو انٹرنیشنل کرکٹ کونسل (آئی سی سی) کو خط لکھنے کی ہدایت کی ہے۔ ان کا کہنا تھا کہ ’جب بنگلہ دیشی کھلاڑی کو معاہدہ ہونے کے باوجود بھارت میں کھیلنے کی اجازت نہیں دی جاتی تو بنگلہ دیش کی پوری ٹیم بھارت میں ورلڈ کپ کھیلنا خود کو محفوظ محسوس نہیں کر سکتی‘۔ نذرول نے یہ بھی ہدایت کی ہے کہ بنگلہ دیش کے ٹی ٹوئنٹی ورلڈ کپ کے تمام میچز سری لنکا منتقل کرنے کے لیے آئی سی سی سے باضابطہ درخواست کی جائے۔بھارت اور سری لنکا کی مشترکہ میزبانی میں ٹی20 ورلڈ کپ 7 فروری سے شروع ہونے والا ہے۔ بنگلہ دیش کے چار گروپ میچز فی الحال بھارت میں شیڈول ہیں۔ پاکستان اپنے تمام میچ سری لنکا میں کھیلے گا اس معاہدے کے تحت جو پہلے طے پایا تھا تاکہ بھارت اور پاکستان کو ملٹی نیشنل ٹورنامنٹس میں غیر جانبدار مقامات پر کھیلنے کی اجازت دی جائے۔

قابل ذکر بات یہ ہے کہ 2024 میں ڈھاکہ میں عوامی بغاوت کے بعد اس وقت کی وزیر اعظم شیخ حسینہ کی حکومت کے خاتمے کے بعد سے ہندوستان اور بنگلہ دیش کے سیاسی تعلقات میں تلخی آئی ہے۔ ہندوستان کی وزارت خارجہ نے حال ہی میں بنگلہ دیش میں اقلیتوں کے خلاف ’مسلسل دشمنی‘ کی مذمت کی ہے، جب کہ بنگلہ دیش کے عبوری رہنما اور نوبل امن انعام یافتہ محمد یونس پر تشدد کا الزام لگایا ہے۔بی سی بی کے صدر امین الاسلام بلبل نے کہا کہ بورڈ اس مسئلے سے نمٹنے کے لیے ایک ہنگامی اجلاس منعقد کرے گا۔ انہوں نے کہا کہ’ہمارے کرکٹرز کا وقار اور تحفظ ہماری اولین ترجیح ہے، ان عوامل کو مدنظر رکھتے ہوئے مناسب وقت پر فیصلہ کیا جائے گا۔‘دسمبر میں آئی پی ایل کی نیلامی میں مستفیض الرحمان کو کولکتہ نائٹ رائیڈرز نے 1 ملین ڈالر سے زیادہ میں خریدا تھا۔ وہ اس سے قبل آئی پی ایل کی مختلف ٹیموں کے لیے کھیل چکے ہیں۔

تاہم، بی سی سی آئی کے سکریٹری دیواجیت سائکیا نے کہا کہ کولکاتا کو 30 سالہ باو¿لر کو’حالیہ پیش رفت کے پیش نظر‘ ریلیز کرنے کا مشورہ دیا گیا تھا۔ نذرول نے یہ بھی کہا کہ وہ بنگلہ دیش میں آئی پی ایل کی نشریات پر پابندی کی درخواست کریں گے۔ انہوں نے کہا کہ میں نے اطلاعات و نشریات کے مشیر سے بنگلہ دیش میں آئی پی ایل ٹورنامنٹ کی نشریات روکنے کی درخواست کی ہے۔بالی ووڈ اداکار شاہ رخ خان کی ٹیم کولکتہ نائٹ رائیڈرز نے ایک بیان جاری کیا جس میں کہا گیا ہے کہ مستفیضور کو مناسب عمل اور مشاورت کے بعد رہا کیا گیا ہے۔

ہندوستھان سماچار

ہندوستان سماچار / Mohammad Khan