مدھیہ پردیش میں موسم کا مزاج بدلے گا، 24-23 جنوری کو بارش کے آثار، 10 اضلاع میں رہے گا اثر

۔ درجہ حرارت میں گراوٹ کے ساتھ سرد لہر چلنے کا بھی امکان

بھوپال، 21 جنوری (ہ س)۔ مدھیہ پردیش میں موسم ایک بار پھر کروٹ لینے جا رہا ہے۔ ایک مضبوط ’ویسٹرن ڈسٹربنس‘ سرگرم ہو رہا ہے، جس کا اثر ریاست کے کئی حصوں میں دیکھنے کو ملے گا۔ اس کے باعث 23 اور 24 جنوری کو ’ماوٹھا‘ گرنے یعنی بارش کا امکان ظاہر کیا گیا ہے۔

محکمہ موسمیات نے بتایا کہ فی الحال ایک ’ویسٹرن ڈسٹربنس‘ پاکستان کے اوپر سرگرم ہے، جو 21 جنوری کی رات شمال مغربی ہندوستان کو متاثر کر سکتا ہے۔ اسی سسٹم کی وجہ سے 23 اور 24 جنوری کو مدھیہ پردیش میں بارش کی صورتحال بن رہی ہے۔ اس کے ساتھ ہی ایک ’سائیکلونک سرکولیشن‘ بھی سرگرم ہے، جس کی وجہ سے منگل کو نرمداپورم سمیت کئی اضلاع میں بادل چھائے رہے۔ شمالی ہندوستان کے اوپر 12.6 کلومیٹر کی بلندی پر قریب 241 کلومیٹر فی گھنٹہ کی رفتار سے ’جیٹ اسٹریم‘ ہوائیں چل رہی ہیں، جس کا اثر ریاست کے موسم پر بھی دیکھا جا رہا ہے۔ ویسٹرن ڈسٹربنس کے اثر سے گوالیار اور ریوا ڈویژن سمیت ریاست کے قریب 10 اضلاع میں بارش کا امکان ہے۔ وہیں، صبح اور رات کے وقت کہرا بھی چھایا رہے گا۔

آج بدھ کی صبح گوالیار، بھنڈ، دتیا، ٹیکم گڑھ، چھترپور، پنا، ستنا اور ریوا میں درمیانی درجے کا کہرا درج کیا گیا۔ اس کے علاوہ بھوپال، اندور اور اجین سمیت کئی شہروں میں ہلکا کہرا دیکھنے کو ملا۔ محکمہ موسمیات کے مطابق، فی الحال رات کے درجہ حرارت میں خاص تبدیلی نہیں ہے، جبکہ دن میں دھوپ نکلنے سے ٹھنڈ کا اثر کم رہے گا۔ آنے والے دنوں میں کم از کم اور زیادہ سے زیادہ درجہ حرارت دونوں میں اضافہ ہو سکتا ہے۔

موسم کے سائنسدانوں کا کہنا ہے کہ ویسٹرن ڈسٹربنس کے گزرنے کے بعد ریاست میں ٹھنڈ کا ایک اور دور لوٹ سکتا ہے۔ جنوری کے آخری دنوں میں درجہ حرارت میں گراوٹ کے ساتھ سرد لہر چلنے کا بھی امکان ہے۔ تب تک دن میں ہلکی گرمی اور راتوں میں ٹھنڈ کا اثر برقرار رہے گا۔ پیشین گوئی کے مطابق، 23 جنوری کو گوالیار، شیوپور، مرینا، بھنڈ اور دتیا میں بارش ہو سکتی ہے، جبکہ 24 جنوری کو گوالیار، بھنڈ، دتیا، نواڑی، ٹیکم گڑھ، چھترپور، پنا، ستنا، ریوا اور مئو گنج میں بارش کے آثار ہیں۔

محکمہ موسمیات کے مطابق، منگل کی رات ریاست میں سب سے کم درجہ حرارت مندسور میں درج کیا گیا، جہاں کم از کم پارہ 5.9 ڈگری سیلسیس رہا۔ راج گڑھ میں 6.6 ڈگری، شاجاپور میں 7.1 ڈگری، دتیا میں 8.6 ڈگری، شیوپوری میں 9 ڈگری اور منڈلا وکھجوراہو میں 9.5 ڈگری سیلسیس درجہ حرارت ریکارڈ کیا گیا۔ بڑے شہروں کی بات کریں تو بھوپال میں کم از کم درجہ حرارت 9.8 ڈگری، اندور میں 8.4 ڈگری، گوالیار میں 10 ڈگری، اجین میں 9.8 ڈگری اور جبل پور میں 14.5 ڈگری سیلسیس رہا۔ دیگر شہروں میں بھی کم از کم درجہ حرارت 10 ڈگری سے اوپر ہی درج کیا گیا۔

ہندوستھان سماچار

---------------

ہندوستان سماچار / انظر حسن