مریضوں کی دیکھ بھال میں نرسنگ استاف کا کردار لائق تحسین : پروفیسر نیئر آصف

علی گڑھ، 19 جنوری (ہ س)۔ نرسنگ اسٹاف اسپتال کی ریڑھ کی ہڈی کی حیثیت رکھتا ہے، مریضوں کی دیکھ بھال میں ان کا کردارکو فراموش نہیں کیا جاسکتا ہے اور جب ڈاکٹرس اور نرسنگ اسٹاف مل کر کام کریں گے یقینا بہتر نتائج برآمد ہوں گے۔ ان خیالا ت کا اظہار علی گڑھ مسلم یونیورسٹی جواہر لعل نہرو میڈیکل کالج اسپتال میڈیکل سپرنٹنڈنٹ پروفیسر نیئر آصف نے کیا۔ وہ ایک استقبالیہ تقریب سے خطاب کررہے تھے۔ انھوں نے مزید کہا کہ انتظامیہ اور نرسنگ برادری کے درمیان بہتر تال میل سے ہم اسپتال کی خدمات کو نئی بلندیوں تک لے جا سکتے ہیں۔

اس موقع پرپروفیسر ضیاء صدیقی (ایڈیشنل میڈیکل سپرنٹنڈنٹ) سمیت تمام ڈپٹی میڈیکل سپرنٹنڈنٹ کو اعزاز سے نوازا گیا۔چیف میڈیکل سپرنٹنڈنٹ اور پرنسپل پروفیسر انجم پرویز ن اور پروفیسر محمد خالد، ڈین، فیکلٹی آف میڈیسن نے مہمان خصوصی کی حیثیت سے شرکت کی۔ اسسٹنٹ نرسنگ سپرنٹنڈنٹ مسز ہما روحی نے سبھی مہمانان کا استقبال کرتے ہوئے کہا آج ہمیں بہت خوشی ہورہی ہے کہ نئے آفیسرس ہمارے درمیاں بہت چھوٹے وقت میں دی گئی دعوت پر پہنچے ہیں،انھوں نے کہاکہ یقینا اگر متحدہ طور پر کام کیا جائے تو میڈیکل کالج اسپتال ترقی کی بلندیوں پر پہنچ سکتا ہے۔ ایڈیشنل میڈیکل سپرنٹنڈنٹ پروفیسر ضیاء صدیقی نے کہا کہ کسی بھی ادارے کو ٹیم ورک اور کوآرڈینیشن سے ہی مضبوط کیا جا سکتا ہے۔ نرسنگ عملے کے تعاون سے، ہم مریضوں کو بہتر، محفوظ اور معیاری خدمات فراہم کرنے کے لیے پرعزم ہیں۔

تقریب کے دوران نرسنگ برادری نے نئے انتظامی افسران کو خوش آمدید کہا اور امید ظاہر کی کہ ان کی قیادت میں اسپتال کے ورک کلچر کو مزید تقویت ملے گی اور مریضوں کی خدمات میں مسلسل بہتری دیکھنے کو ملے گی۔ اس موقع پر ڈپٹی میڈیکل سپرنٹنڈنٹس پروفیسر نسرین نور، پروفیسر ابو ندیم، پروفیسر مہتاب احمد، پروفیسر شاہ محمد عباس وسیم، ڈاکٹر محمد سلمان، ڈاکٹر شہباز حبیب فریدی، ڈاکٹر حسینی ایس حیدر، اور ڈاکٹر سید شارغ نعیم بھی موجود تھے۔ تقریب میں نرسنگ برادری کے تمام نرسنگ انچارجز نے شرکت کی۔ ان میں مسز ہما روحی (اسسٹنٹ نرسنگ سپرنٹنڈنٹ)، شاہانہ پروین (اسسٹنٹ نرسنگ سپرنٹنڈنٹ)، تبسم ملک (نرسنگ انچارج)، انور علی تیلی (ایس او ٹی انچارج)، مرزا شہزاد بیگ (آئی سی یو انچارج) اور نثار جہاں (پیڈیاٹرک وارڈ اور ٹراما سینٹر انچارج) موجود تھے۔اس کے علاوہ اسپتال کے مینٹیننس ڈیپارٹمنٹ، کیئر ٹیکر آفس، ڈرگ اینڈ نان ڈرگ ا سٹور، الیکٹریکل ڈیپارٹمنٹ، انجینئرنگ سیکشن، اکاونٹس سیکشن، پرچیز آفس، میڈیکل سپرنٹنڈنٹ آفس، سی ایم ایس آفس، ڈین آفس اور انکوائری سیکشن کے افسران و ملازمین بھی پروگرام میں موجود تھے۔

ہندوستھا سماچار

---------------

ہندوستان سماچار / سید کامران علی گڑھ