ممبئی، 17 جنوری (ہ س)۔ ممبئی میونسپل کارپوریشن کے انتخابات میں بھارتیہ جنتا پارٹی کی غیر معمولی کامیابی کے بعد وزیر اعلیٰ مہاراشٹر دیویندر فڑنویس نے ممبئی میں منعقدہ ریلی اجتماع سے خطاب کرتے ہوئے اس نتیجے کو عوامی اعتماد کا مظہر قرار دیا اور کہا کہ ممبئی کے شہریوں نے زبان، ذات اور محدود شناخت کی سیاست سے اوپر اٹھ کر بی جے پی کو واضح حمایت دی ہے۔دیویندر فڑنویس نے کہا کہ ممبئی میں بی جے پی 89 نشستیں حاصل کر کے سب سے بڑی جماعت بن کر ابھری ہے، جبکہ مہایوتی اتحاد کو مجموعی طور پر میونسپل کارپوریشن میں مکمل اکثریت حاصل ہوئی ہے۔ ان کے مطابق یہ کامیابی صرف انتخابی اعداد و شمار تک محدود نہیں بلکہ عوام کی جانب سے ترقی، استحکام اور مضبوط قیادت پر مہرِ تصدیق ہے۔وزیر اعلیٰ نے یاد دلایا کہ 2017 کے بلدیاتی انتخابات میں بی جے پی محض دو نشستوں کے فرق سے سب سے بڑی جماعت بننے سے رہ گئی تھی، لیکن اس بار پارٹی نے اس خلا کو پُر کرتے ہوئے نئی تاریخ رقم کر دی ہے۔ انہوں نے کہا کہ گزشتہ تین بلدیاتی انتخابات میں کسی بھی جماعت کو 89 نشستیں حاصل نہیں ہوئیں، جو اس کامیابی کو غیر معمولی بناتی ہیں۔فڑنویس نے کہا کہ بی جے پی نے کم نشستوں پر مقابلہ کرنے کے باوجود شاندار کامیابی حاصل کی، جو پارٹی کے اعلیٰ اسٹرائیک ریٹ اور عوامی حمایت کی عکاسی کرتا ہے۔ ان کے مطابق ممبئی کے ہر علاقے سے بی جے پی کو ووٹ ملے ہیں، چاہے وہ جھونپڑ پٹیاں ہوں، بلند و بالا عمارتیں، چالیں، کرایہ دار بستیاں یا ماہی گیر آبادی۔انہوں نے کہا کہ وہ عناصر جو یہ سمجھتے تھے کہ ممبئی کا مراٹھی ووٹر کسی خاص جماعت کی جاگیر ہے، انہیں اس انتخابی نتیجے نے واضح پیغام دیا ہے کہ ممبئی کا مراٹھی سماج بھی بی جے پی کے ساتھ کھڑا ہے۔ فڑنویس کے مطابق یہ جیت ہمہ گیر اور ہمہ طبقاتی حمایت کا ثبوت ہے۔ریلی سے خطاب میں انہوں نے شیو سینا (شندے گروپ) کی کارکردگی کا بھی ذکر کرتے ہوئے کہا کہ ایکناتھ شندے کی قیادت میں پارٹی نے 29 نشستیں حاصل کیں، اور اگر چند حلقوں میں معمولی فرق نہ ہوتا تو ان کی تعداد مزید بڑھ سکتی تھی۔وزیر اعلیٰ نے ممبئی بی جے پی کے صدر امیت ساتم، پارٹی قیادت اور کارکنان کو اس کامیابی پر مبارک باد دیتے ہوئے کہا کہ یہ جیت تنظیمی نظم، محنت اور عوامی رابطے کا نتیجہ ہے۔انہوں نے کہا کہ بی جے پی ممبئی کے ہر شہری کے لیے کام کرے گی، چاہے اس نے ووٹ دیا ہو یا نہ دیا ہو، کیونکہ یہ جیت ذمہ داریوں میں اضافے کا پیغام ہے۔ فڑنویس نے اختتام پر کہا کہ ممبئی اب آگے بڑھے گی، رکے گی نہیں، اور ترقی کا یہ سفر پوری رفتار سے جاری رہے گا۔

ہندوستھان سماچار

--------------------

ہندوستان سماچار / جاوید این اے