بھوجپور کے دو لاکھ روپے کا انعامی بدمعاش دیپک پانڈے نے روہتاس عدالت میں خودسپردگی کیروہتاس، 17 جنوری (ہ س)۔ بہار کے روہتاس ضلع میں پولیس کی مسلسل دبش قرقی اور ضبطی کے دباؤ میں بھوجپور کا بدنام زمانہ بدمعاش دیپک پانڈے نے سب ڈویزنل سول کورٹ میں خودسپردگی کی۔ دیپک پانڈے بھوجپور ضلع کے تراری تھانہ علاقے کے بھکورا گاؤں کا رہنے والا ہے۔ ریاستی حکومت نے اس پر 2 لاکھ روپے انعام کا اعلان کیا تھا۔ پولیس کے مطابق وہ کافی عرصے سے مفرور تھا اور اس کے خلاف کئی سنگین جرائم کے مقدمات درج ہیں۔دیپک پانڈے کے خلاف ایار کوٹھا تھانہ علاقے کے ایک گاؤں میں قتل کی کوشش (دفعہ 307) اور آرمس ایکٹ کے تحت ایف آئی آر درج کی گئی ہے۔ اس معاملے کے دیگر ملزمین پہلے ہی خودسپردگی کر چکے تھے، لیکن دیپک فرار رہا۔ پولیس ذرائع کے مطابق اس کے خلاف بھوجپور ضلع کے کئی تھانوں میں دفعہ 341، 323، 307، 386 اور آرمس ایکٹ کے تحت کئی مقدمات درج ہیں۔ ایک ہفتہ قبل سب ڈویزنل سول کورٹ کی جانب سے قرقی اور ضبطی کا حکم جاری کیا گیا تھا جس کے بعد اس نے خودسپردگی کا فیصلہ کیا۔خودسپردگی کے بعد دیپک پانڈے کا ایک ویڈیو سوشل میڈیا پر وائرل ہو رہا ہے۔ ویڈیو میں اس کا دعویٰ ہے کہ بھوجپور اور روہتاس پولیس اسے غیر ضروری طور پر پھنسا رہی ہے۔ اس نے الزام لگایا کہ اس کے خلاف اس کے مخالفین کی جانب سے جھوٹے مقدمات درج کیے گئے ہیں۔ اس نے اپنے دو بھائیوں کے بہیمانہ قتل کا ذکر کیا اور کہا کہ انہیں بھی گولی ماری گئی۔ اس نے بھوجپور ایس پی کی پہل پر عدالت میں خودسپردگی کا فیصلہ کیا۔ اس نے پولیس انتظامیہ سے تمام معاملات کی منصفانہ تحقیقات کا مطالبہ بھی کیا۔دیپک پانڈے نے سب ڈویزنل سول کورٹ کی فرسٹ کلاس جوڈیشل مجسٹریٹ ریچا کشیپ کے سامنے خودسپردگی کی۔ عدالت کے حکم کے بعد پولیس نے اسے حراست میں لے کر جیل بھیج دیا۔ ڈہری کے اے ایس پی اتلیش جھا نے اس کی تصدیق کی۔ انہوں نے بتایا کہ دریہٹ تھانہ میں اسلحہ ایکٹ کے تحت مقدمہ نمبر 78/19 درج کیا گیا تھا، جس میں قرقی ضبطی کا حکم جاری کیا گیا تھا۔ پولیس کی مسلسل کارروائی کے باعث ملزم نے خود سپردگی کی۔ پولیس کا کہنا ہے کہ دیپک پانڈے ایک بدنام زمانہ بدمعاش ہے جس کے خلاف سنگین مجرمانہ سرگرمیوں کے متعدد ثبوت موجود ہیں۔ اس کے سر پر 2 لاکھ روپے کے انعام کے باوجود وہ فرار رہا، لیکن اب پولیس کی مسلسل نگرانی اور دباؤ کی وجہ سے وہ خود سپردگی پر مجبور ہوا۔ ہندوستھان سماچار

ہندوستان سماچار / Mohammad Afzal Hassan