نئی دہلی،14جنوری(ہ س)۔ملک کے ممتاز دانشور، ماہرِ اقتصادیات و عمرانیات، محروم طبقات کے حقوق کے پرعزم علمبردار، ہندوستان اور عالمِ اسلام کے درمیان تعلقات کی ایک مضبوط کڑی، معروف و معتبر تھنک ٹینک انسٹی ٹیوٹ آف آبجیکٹیو اسٹیڈیز کے بانی و سرپرستِ اعلیٰ اور آل انڈیا ملی کونسل کے جنرل سیکریٹری ڈاکٹر محمد منظور عالم کے انتقال پر آل انڈیا مسلم مجلس مشاورت نے گہرے رنج و غم کا اظہار کیا۔آل انڈیا مسلم مجلس مشاورت کے قومی صدر فیروز احمد ایڈوکیٹ نے اپنے تعزیتی بیان میں کہا کہ ڈاکٹر محمد منظور عالم ایک دور اندیش اسکالر، عظیم ادارہ ساز اور محققین و اہل فکر کی کئی نسلوں کے لیے مشعل راہ تھے۔ انہوں نے علمی دیانت، فکری بصیرت اور سماجی ذمہ داری کے ساتھ اپنی پوری زندگی علم و تحقیق، سماجی انصاف اور محروم طبقات کے حقوق کی جدوجہد کے لیے وقف کر دی۔ صدر مشاورت نے کہا کہ انسٹی ٹیوٹ آف آبجیکٹیواسٹیڈیز کے قیام میں ڈاکٹرمحمد منظور عالم کا کردار سنگ میل کی حیثیت رکھتا ہے۔ علمی برتری، اخلاقی تحقیق اور فکری خود اعتمادی کے فروغ کے لیے ان کی تاحیات خدمات نے نہ صرف ہندوستان بلکہ عالمی سطح پر علمی اور سماجی مباحث کو نئی سمت عطا کی۔ ہندوستان اور عالم اسلام کے درمیان فکری و تہذیبی روابط کو مضبوط کرنے میں بھی ان کی خدمات ناقابل فراموش ہیں۔ صدر مشاورت نے مزید کہا کہ ڈاکٹر محمد منظور عالم کا انتقال صرف انسٹی ٹیوٹ آف آبجیکٹیو اسٹیڈیز ہی نہیں بلکہ پوری علمی، فکری اور سماجی برادری کے لیے ایک ناقابل تلافی نقصان ہے، جس کا خلا مدتوں پر نہیں ہو سکے گا۔ اللہ تعالیٰ مرحوم کو جنت الفردوس میں اعلیٰ مقام عطا فرمائے، ان کی عمر بھر کی خدمات کو قبول فرمائے، ان کی کوتاہیوں کو معاف کرے اور ان کے اہل خانہ، رفقا اور ان تمام لوگوں کو صبر و حوصلہ عطا فرمائے جو ان کے کام سے مستفید ہوئے۔ہندوستھان سماچار

ہندوستان سماچار / Md Owais Owais