جموں, 12 جنوری (ہ س)۔ وادی کشمیر بھر میں پیر کے روز کم سے کم درجۂ حرارت میں معمولی بہتری دیکھی گئی، تاہم درجۂ حرارت بدستور نقطۂ انجماد سے نیچے رہا۔ سرینگر میں کم سے کم درجۂ حرارت منفی 2.4 ڈگری سیلسیس ریکارڈ کیا گیا، جبکہ گلمرگ اور پہلگام میں درجۂ حرارت منفی 3.4 ڈگری سیلسیس رہا۔

جموں خطے میں جموں شہر کا کم سے کم درجۂ حرارت 3.4 ڈگری سیلسیس، کٹرا میں 5 ڈگری، بٹوت میں 4.3 ڈگری، بانہال میں 5.1 ڈگری اور بھدرواہ میں منفی 1.2 ڈگری سیلسیس ریکارڈ کیا گیا۔

محکمۂ موسمیات کے مطابق 11 سے 15 جنوری کے دوران جموں و کشمیر میں موسم جزوی طور پر ابر آلود رہنے کا امکان ہے۔ پیش گوئی کے مطابق 16 اور 17 جنوری کو کشمیر کے بالائی علاقوں میں کہیں کہیں ہلکی بارش یا برفباری کے ساتھ عام طور پر ابر آلود موسم رہ سکتا ہے۔ 18 اور 19 جنوری کو موسم جزوی سے عمومی طور پر ابر آلود رہے گا، جبکہ 20 جنوری کو چند مقامات پر ہلکی بارش یا برفباری متوقع ہے۔ 21 سے 23 جنوری کے درمیان کئی علاقوں میں بارش یا برفباری کا امکان ہے، جبکہ 24 اور 25 جنوری کو موسم دوبارہ جزوی طور پر ابر آلود رہنے کی توقع ہے۔

محکمۂ موسمیات نے ایک ایڈوائزری بھی جاری کی ہے، جس کے مطابق پیر سے کئی علاقوں میں کم سے کم درجۂ حرارت میں بتدریج اضافہ متوقع ہے۔ جموں ڈویژن کے میدانی علاقوں میں آئندہ پانچ دنوں کے دوران درمیانی درجے کی دھند، جبکہ بعض مقامات پر شدید دھند چھائی رہنے کا امکان ہے۔

جموں و کشمیر، بالخصوص وادیٔ کشمیر کے لیے ایک تشویشناک صورتحال سامنے آئی ہے، کیونکہ محکمۂ موسمیات نے 25 جنوری تک شدید سرد اور خشک موسم کی پیش گوئی کی ہے۔ طویل خشک دورانیہ باعثِ تشویش ہے، کیونکہ زراعت، باغبانی اور پینے کے پانی کے لیے اہم آبی ذخائر کا انحصار جاری 40 روزہ سخت سردی کے دور، جسے مقامی طور پر چلے کلان کہا جاتا ہے، کے دوران ہونے والی بھاری برفباری پر ہوتا ہے۔

یہ اہم مرحلہ 30 جنوری کو اختتام پذیر ہوگا، آدھے سے زیادہ گزر چکا ہے، تاہم اب تک وادی کے میدانی علاقوں میں اس موسم کی پہلی برفباری نہیں ہوئی۔ فروری اور مارچ میں ہونے والی برفباری کو کم مفید سمجھا جاتا ہے، کیونکہ وہ تیزی سے پگھل جاتی ہے اور پہاڑوں میں موجود مستقل آبی ذخائر کو مناسب حد تک بھرنے میں ناکام رہتی ہے۔

ہندوستھان سماچار

---------------

ہندوستان سماچار / محمد اصغر