بنگلورو، 10 جنوری (ہ س)۔

کرناٹک قانون ساز اسمبلی میں قائد حزب اختلاف آر اشوک نے کیرالہ حکومت کی طرف سے تجویز کردہ ملیالم زبان بل 2025 پر کانگریس پارٹی اور رکن پارلیمنٹ پرینکا گاندھی کو نشانہ بنایا ہے۔ انہوں نے سوال کیا کہ کیا پرینکا گاندھی، جنہوں نے کیرالا میں ہاتھیوں کے حملے اور وائناڈ میں قدرتی آفات سے ہونے والی اموات کے باوجود کیرالہ کے لوگوں کی جانب سے کرناٹک حکومت سے مدد طلب کی ہے، اب وہ کنڑ بولنے والوں کے حقوق کے لیے بھی آواز اٹھائیں گی۔

ہفتہ کو سوشل میڈیا پر جاری کردہ ایک بیان میں، آر اشوک نے کہا کہ مجوزہ بل میں کیرالہ کے کنڑ میڈیم اسکولوں میں پہلی سے دسویں جماعت تک ملیالم کو لازمی پرائمری زبان بنانے کی تجویز ہے۔ انہوں نے الزام لگایا کہ یہ اقدام کاسرگوڈ سمیت کیرالہ میں رہنے والے کنڑ بولنے والوں کے لسانی اور ثقافتی حقوق کی کھلی خلاف ورزی ہے۔

آر اشوک نے یہ بھی پوچھا کہ کیا کانگریس اور اس کے لیڈران کیرالہ کے مفادات کے لیے وہی فکر دکھائیں گے جیسی وہ بانڈی پور میں رات کی ٹریفک پر پابندی ہٹانے کے معاملے کے لیے کرتے ہیں، جو کرناٹک کے لوگوں کے لیے ایک اہم مسئلہ ہے۔

انہوں نے کانگریس لیڈر کے سی وینوگوپال کی تنقید کرتے ہوئے کہا کہ وہ غیر قانونی تارکین وطن کے معاملے پر انسانیت کے نام پر روہنگیا اور بنگلہ دیشیوں کی حمایت میں بولتے ہیں، لیکن کیا انہیں کاسرگوڈ کے کنڑ بولنے والے لوگوں کے لسانی اور ثقافتی حقوق کی کوئی فکر ہے؟

آر اشوک نے الزام لگایا کہ کیرالہ میں کانگریس قیادت بار بار کرناٹک کی عزت نفس اور وقار کو ٹھیس پہنچا رہی ہے اور کنڑ بولنے والوں کے صبر کا امتحان لے رہی ہے۔ انہوں نے خبردار کیا کہ وہ دن دور نہیں جب کنڑ بولنے والے کانگریس پارٹی کو سبق سکھائیں گے جو سیاسی فائدے اور خود غرضی کے لیے کرناٹک اور کنڑ بولنے والے کمیونٹی کے مفادات کو قربان کر رہی ہے۔

ہندوستھان سماچار

ہندوستان سماچار / عطاءاللہ