نئی دہلی، 26 دسمبر (ہ س)۔ وزیر اعظم نریندر مودی نے جمعہ کو ویر بال دیوس کے موقع پر صاحبزادوں کی بے مثال قربانی کو عقیدت کے ساتھ یاد کیا۔ انہوں نے کہا کہ ویر بال دیوس صاحبزادوں کی شجاعت، ایثار اور قربانی کو یاد کرنے کا دن ہے۔

ایکس پر شیئر کیے گئے اپنے پیغام میں، وزیر اعظم نے کہا کہ اس موقع پر ماتا گجری جی کے غیر متزلزل عقیدے اور سری گرو گوبند سنگھ جی کی لافانی تعلیمات کو بھی یاد کیا جاتا ہے۔ انہوں نے کہا کہ ویر بال دیوس ایک ایسا دن ہے جو ہمت، عزم مصمم اور صداقت سے جڑا ہوا ہے۔

مودی نے کہا کہ صاحبزادوں کی زندگی اور نظریات آنے والی نسلوں کو متاثر کرتے رہیں گے۔ انہوں نے اہل وطن پر زور دیا کہ وہ اپنی اقدار کو اپنائیں اور قوم کی تعمیر میں اپنا تعاون دیں۔

قابل ذکر ہے کہ سکھوں کے دسویں گرو، سری گرو گوبند سنگھ جی کے چار بیٹے صاحبزادہ اجیت سنگھ، صاحبزادہ جوجھار سنگھ، صاحبزادہ زوراور سنگھ، اور صاحبزادہ فتح سنگھ تھے۔ صاحبزادہ اجیت سنگھ اور صاحبزادہ جوجھار سنگھ 1705 میں چمکور کی جنگ میں مغل فوج سے لڑتے ہوئے شہید ہو گئے۔ چھوٹے صاحبزادوں زوراور سنگھ اور فتح سنگھ کو اسلام قبول کرنے سے انکار کرنے پر سرہند میں زندہ دیواروں میں چنوا دیا گیا تھا۔ اس اذیت میں ماتا گجری جی کا بھی انتقال ہو گیا۔

صاحبزادوں کی اس عظیم قربانی کو ہندوستانی تاریخ میں دھرم، سچائی اور انسانی اقدار کی سربلندی کی ایک منفرد مثال کے طور پر یاد کیا جاتا ہے۔ ویر بال دیوس ہر سال 26 دسمبر کو ان کی بہادری، قربانی اور غیر متزلزل عزم کو خراج عقیدت پیش کرنے کے لیے منایا جاتا ہے۔

ہندوستھان سماچار

ہندوستان سماچار / محمد شہزاد