پٹنہ، 22 دسمبر (ہ س)۔ نتن نوین بھارتیہ جنتا پارٹی کے قومی ایگزیکٹو صدر بننے کے بعد پہلی بار منگل کے روز پٹنہ پہنچیں گے۔ ریاستی بی جے پی نے ان کی آمد کے لیے بڑے پیمانے پر تیاریاں کی ہیں۔ اس دوران بی جے پی یووا مورچہ کے لیڈروں اور کارکنوں نے بھی ان کے استقبال کے لیے خصوصی انتظامات کیے ہیں۔

بی جے پی یووا مورچہ کے علاقائی انچارج راجیو تیواری نے کہا کہ قومی ایگزیکٹو صدر کی ذمہ داری سنبھالنے کے بعد نتن نوین کا پٹنہ کا یہ پہلا دورہ ہے، اور کارکنان اسے ایک عظیم الشان اور تاریخی تقریب بنانے میں پوری طرح مصروف ہیں۔

انہوں نے کہا کہ پٹنہ ہوائی اڈے سے ملر ہائی اسکول کے میدان تک مختلف مقامات پر ان کا استقبال کیا جائے گا۔ اس دوران بی جے پی یووا مورچہ کے کارکنان بھی بائیک ریلی کے ذریعے ان کا ساتھ دیں گے۔

راجیو تیواری نے کہا کہ نتن نوین نے ایک سادہ کارکن سے قومی ایگزیکٹو صدر تک کا سفر طے کیا ہے۔ وہ آج ہزاروں کارکنوں کے لیے ایک تحریک ہیں اور ان کی زندگی جدوجہد اور لگن کی علامت ہے۔

اطلاعات کے مطابق نتن نوین پٹنہ ایئرپورٹ سے ملر ہائی اسکول کے میدان تک روڈ شو کریں گے۔ اس کے بعد ملر اسکول کے میدان میں ایک پروقار میٹنگ کا انعقاد کیا جائے گا، جس میں بہار بی جے پی کے ریاستی صدر سمیت پارٹی کے کئی سینئرلیڈران اور کارکنان موجود ہوں گے۔ توقع ہے کہ اس تقریب سے تنظیم کو نئی توانائی اور سمت ملے گی۔

ہندوستھان سماچار

ہندوستان سماچار / Mohammad Afzal Hassan