نئی دہلی، 14 دسمبر (ہ س)۔ ہندوستانی کرکٹ ٹیم کے سابق کھلاڑی محمد کیف نے کہا ہے کہ آئی سی سی ٹی 20 ورلڈ کپ 2026 سے قبل سوریہ کمار یادو ہندوستانی ٹیم کے لئے شبھمن گل کی فارم سے زیادہ پریشانی کا باعث ہیں۔

ٹی20 ورلڈ کپ کا 10 واں ایڈیشن اگلے سال 7 فروری سے شروع ہوگا، جس کا فائنل 8 مارچ کو شیڈول ہے۔ بھارت اور سری لنکا اس ٹورنامنٹ کی مشترکہ میزبانی کر رہے ہیں۔ ٹورنامنٹ آٹھ مقامات پر منعقد کیا جائے گا (پانچ ہندوستان اور تین سری لنکا میں)۔

سابق ہندوستانی کرکٹر کیف نے اتوار کو انسٹاگرام پر لکھا، ٹی 20 ورلڈ کپ قریب آنے کے ساتھ، سوریہ کی فارم گِل کی بجائے ہندوستان کے لیے زیادہ تشویش کا باعث ہے۔ ہندوستان کے پاس اوپننگ کے بہت سے آپشنز ہیں، لیکن ایک سیٹڈ کپتان کو تبدیل نہیں کیا جا سکتا۔

دونوں بلے بازوں نے اس سال ٹی20I میں معمولی کارکردگی کا مظاہرہ کیا ہے۔ سوریہ کمار یادو نے اس سال ایک بھی نصف سنچری نہیں بنائی ہے۔ ان کی بیٹنگ اوسط اور اسٹرائیک ریٹ بھی ناقص رہا ہے۔ ہندوستانی ٹی20I کپتان نے اس سال 19 میچوں میں 201 رن بنائے ہیں، ابھی تک ایک بھی نصف سنچری نہیں بنائی ہے۔ دائیں ہاتھ کے بلے باز کی اوسط 14.35 ہے اور اس کا اسٹرائیک ریٹ 126.41 ہے۔

دوسری جانب ٹی ٹوئنٹی انٹرنیشنل میں بھی گل کی کارکردگی مایوس کن رہی ہے۔ اس سال گل نے 14 ٹی ٹوئنٹی انٹرنیشنل میچوں میں 263 رن بنائے ہیں۔ ان کی بیٹنگ اوسط 23.90 ہے اور ان کا اسٹرائیک ریٹ 142.93 ہے۔

افریقہ کے خلاف سیریز میں دونوں بلے بازوں کے پاس موقع ہے۔

دونوں بلے بازوں کے پاس جنوبی افریقہ کے خلاف کھیلی جا رہی پانچ میچوں کی ٹی ٹوئنٹی سیریز کے بقیہ میچوں میں رن بنانے کا موقع ہے۔ سیریز فی الحال 1-1 سے برابر ہے۔ سوریہ کمار اور گل اب تک کھیلے گئے دونوں میچوں میں بلے سے اچھی کارکردگی نہیں دکھا سکے۔ گل جہاں پہلے میچ میں 4 رن بنانے کے بعد آؤٹ ہوئے، وہ دوسرے میچ میں اپنا کھاتہ بھی نہ کھول سکے۔ دوسری جانب کپتان سوریہ کمار یادو نے پہلے میچ میں 12 رن کی اننگز کھیلی جب کہ دوسرے میچ میں وہ صرف 5 رن بنا سکے۔ دونوں ٹیموں کے درمیان تیسرا میچ آج (اتوار) رات ہماچل پردیش کے شہر دھرم شالہ میں کھیلا جائے گا۔ دونوں کھلاڑی میچ میں رن بنا کر واپسی کرنا چاہیں گے

---------------

ہندوستان سماچار / عبدالسلام صدیقی