نئی دہلی، 14 دسمبر (ہ س)۔ امریکی ایم ایچ-60 آر سی ہاک کثیر المقاصد ہیلی کاپٹر کی دوسری اسکواڈرن 17 دسمبر کو گوا کے آئی این ایس ہنسا میں شروع کی جائے گی۔ بحریہ کے سربراہ ایڈمرل دنیش کے ترپاٹھی کی موجودگی میں آئی این اے ایس 335 کی کمیشننگ بھارتی بحریہ کی جدید کاری اور بحری صلاحیت میں اضافے کی مسلسل کوششوں میں ایک اہم لمحہ ہوگا۔ اس سے ہند-بحرالکاہل خطے میں بھارت کی بحری جنگی صلاحیت مزید مضبوط ہوگی۔

بھارتی بحریہ نے گزشتہ سال مارچ میں روایتی واٹر کینن سلامی کے ساتھ کوچی کے آئی این ایس گرُوڑ پر ایم ایچ-60 آر کثیر المقاصد ہیلی کاپٹر کی پہلی اسکواڈرن کو آئی این اے ایس 334 کے طور پر باضابطہ طور پر فضائی بیڑے میں شامل کیا تھا۔ بھارتی بحریہ نے امریکی کمپنی لاک ہیڈ مارٹن سے 24 ہیلی کاپٹر 2.6 ارب ڈالر میں خریدے ہیں۔ یہ معاہدہ فروری 2020 میں اُس وقت ہوا تھا جب اُس وقت کے امریکی صدر ڈونلڈ ٹرمپ نے بھارت کا دورہ کیا تھا۔ اب تک 19 ایم ایچ-60 آر سی ہاک بھارت پہنچ چکے ہیں۔ بھارت نے گزشتہ ماہ 28 نومبر کو پانچ سال کے لیے ایم ایچ-60 آر ہیلی کاپٹروں کی مرمت، جانچ اور دیکھ بھال کی سہولت ملک میں ہی فراہم کرنے کے لیے امریکی کمپنی کے ساتھ معاہدہ کیا ہے۔

دفاعی سکریٹری راجیش کمار سنگھ کی موجودگی میں امریکی حکومت کے ساتھ کیے گئے اس معاہدے کی لاگت تقریباً 7,995 کروڑ روپے ہے۔ اس معاہدے سے بحریہ کی آپریشنل دستیابی، صلاحیت سازی اور خود انحصار بھارت کو فروغ ملے گا۔ وزارتِ دفاع کے مطابق امریکی حکومت سے حاصل ہونے والی ٹیکنالوجی سے ہر موسم میں کام کرنے والے ایم ایچ-60 آر ہیلی کاپٹروں کی آپریشنل دستیابی اور دیکھ بھال میں اضافہ ہوگا، جن میں آبدوز مخالف جنگی صلاحیت بھی شامل ہے۔ اس کے علاوہ یہ تعاون ان ہیلی کاپٹروں کو مختلف مقامات کے ساتھ ساتھ جہازوں سے بھی آپریشن کرنے میں مدد دے گا، جس سے ان کے تمام بنیادی اور ثانوی مشن/کردار کے دوران بہترین کارکردگی ممکن ہو سکے گی۔

ہندوستھان سماچار

---------------

ہندوستان سماچار / عبدالواحد