پرانے پنشن نظام کی بحالی کے لیے ناگپور میں آج جمعہ کو بڑا عوامی مارچ

ناگپور، 11 دسمبر(ہ س)۔ مہاراشٹر

میں سرکاری و نیم سرکاری ملازمین کی تنظیموں نے پرانی پنشن اسکیم کی بحالی کے

مطالبے کو مضبوط کرتے ہوئے جمعہ کو ناگپور میں ایک بڑے احتجاجی مارچ کا اہتمام کیا

ہے۔ یہ مارچ ریاستی مقننہ کے جاری سرمائی اجلاس کے موقع پر منعقد کیا جا رہا ہے

تاکہ اراکینِ اسمبلی کی توجہ نئی پنشن اسکیم کے باعث پیدا ہونے والے عدم اطمینان کی

طرف مبذول ہو سکے۔

اولڈ

پنشن اسکیم تنظیم کی جانب سے منعقد ہونے والا ’’پنشن عوامی انقلاب مارچ‘‘ ان تمام

ملازمین کے حق میں ایک بڑی اجتماعی آواز بن گیا ہے جو یکم نومبر 2005 کے بعد

ملازمت میں آئے اور جنہیں ڈی سی پی ایس کے

تحت مارکیٹ پر مبنی پنشن نظام میں شامل کیا گیا، جسے ملازمین انتہائی غیر یقینی

اور غیر مستحکم سمجھتے ہیں۔

ریاستی

نمائندے وشنو اُدے نے کہا کہ موجودہ نظام میں ملازمین کی تنخواہوں سے کٹوتی ہوتی

ہے اور حاصل ہونے والی رقم اسٹاک مارکیٹ کے اتار چڑھاؤ سے مشروط ہوتی ہے، جس کی

وجہ سے ریٹائرمنٹ کے بعد معاشی تحفظ کی کوئی ضمانت نہیں ہوتی۔ ان کے مطابق یہی

صورتحال لاکھوں سرکاری ملازمین کی بے چینی کا بنیادی سبب ہے۔

تنظیم

کے مطابق پرانی پنشن اسکیم کی بحالی کے لیے تحریک کو گزشتہ برسوں میں قابلِ ذکر

کامیابیاں ملی ہیں، جن میں فیملی پنشن، معذوری پنشن، گریجویٹی، ہمدردانہ بنیاد پر

دس لاکھ روپے کی گرانٹ اور 1 نومبر 2005 سے قبل منتخب مگر بعد میں جوائن کرنے والے

ملازمین کے لیے او پی ایس کی اہلیت جیسے اہم فیصلے شامل ہیں۔ ڈی سی پی ایس کھاتوں کے مراعات میں اضافہ بھی انہی کوششوں کا

نتیجہ ہے۔

احتجاج

کے لیے ریاست گیر سطح پر اپیل کی گئی ہے، جس کی قیادت رتناکر ڈونگرے، سرجیراؤ

چوان، اشونی گری، سمنت سکراتے، مادھو پنتوجے، رمیش کھرات، گیانبا واگاڈکر اور روی

کمار کمبھار کر رہے ہیں۔ لیڈران کا کہنا ہے کہ یہ مارچ حکومت کو واضح پیغام دینے

کے لیے ایک فیصلہ کن مرحلہ ثابت ہوگا کہ ملازمین اب پرانی پنشن اسکیم کی بحالی سے

کم کسی بات پر راضی نہیں ہوں گے۔

ہندوستھان

سماچار

--------------------

ہندوستان سماچار / جاوید این اے