امارت شرعیہ کی زیارت اور اس کی خدمات و کارناموں کو سن کردل بے حد مسرور ہوا : سابق چیف کمشنر انکم ٹیکسپٹنہ، 11 دسمبر(ہ س)۔ امارت شرعیہ پھلواری شریف کی زیارت کے لئے تشریف لانے والے جموں وکشمیر کے سابق چیف کمشنر انکم ٹیکس صوفی غلام رسول نے اپنے قلبی تأثرات کا اظہار کرتے ہوئے فرمایا کہ آج میری برسوں کی تمنا اور آرزو پوری ہورہی ہے۔ عرصہ سےا مارت شرعیہ کی دیدار کی خواہش تھی۔ اللہ تعالیٰ نے میری اس خواہش کو پوری کردی اور جو کچھ قبل سے سن رکھا تھا، آج اس ادارہ کی خدمات کو آنکھوں سے دیکھ کر اور سن کر مزید دل بے حد مسرور و متأثرہوا۔ اللہ تعالیٰ اس شجر طوبی کو قیامت تک کے لئے شر سبز وشاداب رکھے اور اس کے ذریعہ ہورہے قوم وملت کی بیش بہا خدمات کو شرف قبولیت عطاکرے۔ مہمان محترم نے امارت شرعیہ کے کاموں کو سراہتے ہوئے کہا کہ بلاشبہ یہ ادارہ ملک کا ایک ممتاز اور مثالی ادارہ ہے جہاں مسلمان ایک امیر شریعت کے ماتحت کلمہ واحدہ کی بنیاد پر متحد ومنظم زندگی گذاررہے ہیں اوربلاتفریق مذہب وملت عام انسانوں کی خدمت کررہا ہے جس سے مذہبی فرقوںکے ساتھ صلح وآشتی کو فروغ مل رہا ہے۔ میر ی دعاء ہے اللہ تعالیٰ اس ادارہ کو مزید ترقیات سے نوازے اور ہر طرح کے شروفتن سے محفوظ رکھے ۔مہمان محترم کے ہمراہ محمدعاشق ابراہیمی سابق ڈی ایم مونگیر اور جمال الدین بھی شریک کارواں تھے جنہوں نے امارت شرعیہ کے نظام کار کو دیکھ کر کہا کہ یہ ادارہ ملت کا قیمتی اثاثہ ہے۔ مہمانان کرام کا ناظم امارت شرعیہ بہار اڈیشہ، جھارکھنڈ ومغربی بنگال مولانامفتی محمد سعیدالرحمن قاسمی نے اپنے رفقاء کرام کے ساتھ پرتپاک انداز میں استقبال کیا اور ان کے روبرو امارت شرعیہ کی رفاہی وفلاحی خدمات اور کارناموں کا تفصیلی تعارف پیش کیا ناظم نے کہا کہ امارت شرعیہ کا قیام 1921 ء میں عمل آیا جس کو سوسال سے زیادہ کا عرصہ گذر چکا ہے۔اس طویل عرصہ میں امارت شرعیہ نے جرأت مندانہ قیادت سے ملت کی صحیح سمت میں رہنمائی کی، مسلمانوں کو محض کلمہ کی بنیاد پر منظم و متحد رکھنے اور نظام شرعی کے قیام اورتحفظ مسلمین کے لئے مسلسل کو شش کرتی آرہی ہے جس کے باعث اس کا دائرہ دن بدن پھیلتا جارہا ہے۔ کام کی ہمہ گیری اور وسعت کے پیش نظر مختلف شعبے قائم ہوئے جن کے ذریعہ دین وملت کی مضبوط خدمات انجام پارہی ہیں۔ اس وقت موجودہ امیر شریعت مفکر ملت مولاناسید احمد ولی فیصل رحمانی کی امارت میں ادارہ ترقی کی شاہراہ پر گامزن ہے ۔ انہوں نے امارت شرعیہ کے جملہ شعبہ جات کی خدمات کا اجمالی تعارف بھی کرایا، دارالقضاء ،دارالافتاء ،شعبہ تبلغ وتنظیم ،شعبہ تعلیم مذہبی وعصری ،تحفظ مسلمین ،بیت المال شعبہ نشر واشاعت کے علاوہ ٹیکنیکل، آئی ٹی آئی اورمولانا سجاد میموریل اسپتال کی قیمتی خدمات بیان کئے جس سے مہمان کرام حدرجہ متأ ثر ہوئے اور پرمسرت انگیز میں ایک خوشگوار اثرات محسوس کرتے رہے اور دعاؤں سے نوازتے رہے۔مہمانان کے ساتھ استقبالیہ مجلس میں امارت شرعیہ کے مرکزی و ذیلی دار القضاء کے قاضی شریعت مولانا مفتی محمد انظار عالم قاسمی، امارت شرعیہ کے نائب ناظم مولانا مفتی محمد ثناء الہدیٰ قاسمی، شعبہ پرجیکٹ منیجمینٹ کے مینیجر احسان الحق، مولانا رضوان احمد ندوی معاون ناظم، مولانامحمد ابوالکلام شمسی معاون ناظم، ڈاکٹر یاسرحبیب سکریٹری مولانا سجاد میموریل اسپتال اور مولانا محمدشارق رحمانی رفیق دفتر نظامت امارت شرعیہ موجود رہے اور امارت شرعیہ کے تعلق سے مہمانوں کے ساتھ محو گفتگو رہے ۔ ہندوستھان سماچار

ہندوستان سماچار / Mohammad Afzal Hassan