حیدرآباد، 11 دسمبر (ہ س)۔ حیدرآباد میں حالیہ دنوں شدید اور غیر معمولی بارشوں نے شہری زندگی کو متاثر کیاہے، ایک ہی دن میں 10 سے 20 سینٹی میٹر تک بارش ریکارڈ کی گئی۔ ایسے حالات میں حیڈرا کمشنر اے وی رنگناتھ نے کہاکہ شہر کو سیلاب سے محفوظ رکھنے کی ذمہ داری ہم سب پرعائد ہوتی ہے۔ انہوں نے اعلان کیا کہ ڈِی سِلٹنگ کے بڑے پیمانے پر کام جنوری سے شروع کیے جائیں گے اور اپریل تک مکمل کر لیے جائیں گے تاکہ مانسون کے دوران پانی کی نکاسی میں کوئی رکاوٹ نہ آئے۔حیڈرا دفتر میں جی ایچ ایم سی مینٹیننس ڈپارٹمنٹ اور حیڈرا عہدیداروں کے ساتھ منعقدہ کوآرڈینیشن میٹنگ میں کمشنر نے کہاکہ رواں سال مانسون کے آغاز میں کچھ مشکلات پیش آئیں، لیکن بعد میں محکمہ نے کامیابی سے سیلابی صورتحال پر قابو پایا۔ انہوں نے کہاکہ کیچ پِٹس، کلورٹس اور بڑی نالوں سے بھی سلٹ ہٹائی گئی جس سے پانی کے بہاؤ میں کافی بہتری آئی۔کمشنر رنگناتھ نے کہاکہ اس مانسون میں سامنے آنے والی مشکلات نے کئی اہم سبق سکھائے ہیں، جو آنے والے سال میں مزید بہتر اور مؤثر کام کی راہ ہموار کریں گے۔ حیڈراکی ٹیمیں آئندہ مانسون سے پہلے تمام محکموں کو مکمل تعاون فراہم کریں گی۔
ڈِی سِلٹنگ کے کاموں کی نگرانی میں مقامی رہائشیوں اور عوامی نمائندوں کو شامل کرنے کی ہدایت بھی جاری کی گئی۔ کمشنر نے کہا کہ نالوں کے نیٹ ورک میں رکاوٹیں، مضافاتی علاقوں کی صورتحال اور مقامی مسائل کو سمجھنے میں رہائشی بہت اہم کردار ادا کرتے ہیں۔ بستی باٹا پروگرام کے ذریعے عوام کو نالوں کی صفائی میں شامل کیا جائے گا، جیسا کہ ٹولی چوکی،گوری شنکر نگر اور یاقوت پورہ میں دیکھاگیا جہاں مقامی افراد نے بھرپور تعاون کیا۔
کمشنر نے افسران کو واضح ہدایت دی کہ نالوں کی ڈِی سِلٹنگ میں کسی قسم کا سمجھوتا قبول نہیں ہوگا۔ کانٹریکٹرز کو سلٹ کی مقدار یا مقام کی بنیاد پرکام سے انکار کی اجازت نہیں ہوگی۔انہوں نے امیر پیٹ کے مائیتری ونم کے قریب بند پڑی انڈر گراؤنڈ ڈرینج لائنوں کو کلیر کرنے اور سکندرآباد کے پٹنی نالے پر ناجائز قبضے ہٹاکر اسے وسیع کرنے جیسے کامیاب اقدامات کی مثالیں بھی پیش کیں۔انہوں نے کہا کہ چند افراد کی تکلیف کے مقابلے میں ہزاروں لوگوں کی مشکلات دور کرنا اصل ترجیح ہونی چاہیے۔ نالوں کی صفائی کے ساتھ ساتھ ان کی دیکھ بھال بھی اتنی ہی اہم ہے۔
اس میٹنگ میں حیڈرا ایڈیشنل ڈائریکٹر ورلا پاپیا، جی ایچ ایم سی مینٹیننس چیف انجینئر رتناکر، ایس این ڈی پی پروجیکٹ کی چیف انجینئر جوتِرمئی، حیڈرا آر ایف وی او جئے پرکاش، ڈی ایف وی اوز،ایس ایف وی اوز، اثاثہ تحفظ انسپکٹرس اوردیگر انجینئرز نے شرکت کی اور اپنے علاقوں کے مسائل پیش کیے۔
ہندوستھان سماچار
ہندوستان سماچار / محمدعبدالخالق
