تہران، 8 نومبر (ہ س)۔

ایرانی صدر مسعود پیزشکیان نے خبردار کیا ہے کہ خشک سالی سے متاثرہ دارالحکومت تہران کو اگر بارش جلد نہ ہوئی تو پانی کے شدید بحران کا سامنا کرنا پڑ سکتا ہے۔ انہوں نے کہا کہ اگر ایسی صورت حال پیدا ہوئی تو تہران کو خالی کرنا پڑے گا۔

میڈیا رپورٹس کے مطابق جمعرات کو مغربی شہر سنندج کے دورے کے دوران صدر پیزشکیان نے کہا کہ حکومت بیک وقت اقتصادی، ماحولیاتی اور سماجی چیلنجوں سے نمٹنے کے لیے جدوجہد کر رہی ہے۔ انہوں نے خبردار کیا کہ تہران کو پانی فراہم کرنے والے مرکزی ذخائر میں صرف دو ہفتوں کے لیے کافی پانی ہے۔

خشک سالی سے پیدا ہونے والے پانی کے بحران کو ایران کے سب سے سنگین قدرتی چیلنجوں میں سے ایک قرار دیتے ہوئے، پیزشکیان نے خبردار کیا کہ اگر خشک سالی جاری رہی تو تہران میں اگلے ماہ پانی کی تقسیم کو محدود کر دیا جائے گا۔

انہوں نے خبردار کیا، اگر یہ خشک سالی جاری رہی تو ہمارے پاس پانی ختم ہو جائے گا اور شہر کو خالی کرنا پڑ سکتا ہے۔

صدر نے ملک کے پانی اور توانائی کے وسائل کے بہتر انتظام اور تحفظ کی فوری ضرورت پر زور دیا اور موجودہ صورتحال کو انتہائی تشویشناک قرار دیا۔

تہران کی پانی کی فراہمی کا انحصار پانچ بڑے ڈیموں پر ہے: لار، مملو، امیر کبیر، تلیغان اور لاتیان، جن میں امیر کبیر سب سے بڑا ہے۔ تہران واٹر اتھارٹی نے جولائی میں اس تشویش کا اظہار کیا تھا کہ پانی کے ذخائر ایک صدی میں اپنی کم ترین سطح پر پہنچ گئے ہیں۔

گزشتہ ہفتے، اتھارٹی کے سربراہ، بہزاد پارسا نے اس بات کا اعادہ کیا کہ اگر موسم خشک رہا تو ڈیموں میں باقی پانی صرف دو ہفتوں تک شہر کی ضروریات کو پورا کر سکے گا۔ پانی کے بحران کی شدت کو دیکھتے ہوئے حکام نے شہریوں سے پانی کو محفوظ کرنے کی اپیل کی ہے۔

ہندوستھان سماچار

ہندوستان سماچار / عطاءاللہ