بیلیم (برازیل)، 7 نومبر (ہ س): اقوام متحدہ کے سکریٹری جنرل انتونیو گوٹیرس نے عالمی سطح پر درجہ حرارت میں اضافے کو 1.5 ڈگری سیلسیس سے کم تک محدود کرنے میں ناکامی پر عالمی رہنماؤں کو تنقید کا نشانہ بناتے ہوئے اسے ان کی اخلاقی گراوٹ اور لاپرواہی کی علامت قرار دیا۔ انہوں نے خبردار کیا کہ اس حد کی عارضی خلاف ورزی کے بھی سنگین نتائج برآمد ہوں گے، جس سے ماحولیاتی نظام تباہ ہو جائیں گے۔
انہوں نے یہ بات جمعرات کو یہاں منعقدہ اقوام متحدہ کی ماحولیاتی تبدیلی کانفرنس یعنی کانفرنس آف پارٹنرز (سی او پی 30) کی غیر رسمی کانفرنس کے افتتاحی اجلاس سے خطاب کرتے ہوئے کہی۔
انہوں نے کہا، کئی تنظیمیں ماحولیاتی تباہی سے فائدہ اٹھا رہی ہیں۔ اربوں ڈالر لابنگ، عوام کو بے وقوف بنانے اور ترقی میں رکاوٹیں ڈالنے پر خرچ ہو رہے ہیں، اور بہت سے سیاستدان اس میں اپنے مفادات تلاش کر رہے ہیں۔
کانفرنس میں موجود 30 سے زائد سربراہان مملکت سے براہ راست بات کرتے ہوئے انہوں نے کہا کہ ہمیں فیصلہ کرنا ہے کہ ہم آگے بڑھنا چاہتے ہیں یا فنا ہونا۔ یہ ایک اخلاقی ناکامی اور سراسر غفلت ہے۔
دریں اثنا، عالمی موسمیاتی تنظیم (ڈبلیو ایم او) نے جمعرات کو جاری کردہ ایک رپورٹ میں اقوام متحدہ کے سیکرٹری جنرل کے دعوؤں کی تصدیق کی ہے۔ رپورٹ کے مطابق زمین کو گرم کرنے والی گرین ہاؤس گیسوں میں خطرناک اضافہ ہوا ہے۔ رپورٹ کے مطابق، 2025 ریکارڈ پر دوسرا یا تیسرا گرم ترین سال بننے کی راہ پر گامزن ہے، اور ریکارڈ پر دس گرم ترین سال پچھلی دہائی میں پیش آئے۔ کانفرنس میں دنیا بھر سے تقریباً 150 سربراہان مملکت یا قائدین کے اپنے خیالات کا اظہار متوقع ہے۔ تاہم، امریکہ، چین، بھارت، اور روس جیسے بڑے آب و ہوا کو آلودہ کرنے والوں کی عدم موجودگی سربراہی اجلاس کی کامیابی پر سوالات اٹھا رہی ہے۔ امریکہ نے کوئی نمائندہ نہیں بھیجا ہے۔ امریکی صدر ڈونلڈ ٹرمپ اپنے پہلے دور میں پیرس معاہدے سے دستبردار ہو گئے تھے۔ اگرچہ ان کے جانشین صدر جو بائیڈن نے ماحولیاتی معاہدوں میں شامل ہونے پر رضامندی ظاہر کی تھی لیکن ٹرمپ کے دوبارہ صدر بننے کے بعد امریکہ ان معاہدوں سے ایک بار پھر پیچھے ہٹ گیا۔
یہ بات قابل غور ہے کہ سی او پی کا 30 واں اجلاس باضابطہ طور پر 10 نومبر سے 21 نومبر تک منعقد ہوگا۔ اس وقت غیر سرکاری بات چیت اور تیاری کی سرگرمیاں جاری ہیں۔
---------------
ہندوستان سماچار / عبدالسلام صدیقی
