لکھنؤ، 7 نومبر (ہ س)۔ قومی گیت ”وندے ماترم“ کی 150ویں سالگرہ کے موقع پر جمعہ کو لوک بھون میں منعقدہ ایک پروگرام سے خطاب کرتے ہوئے اتر پردیش کے وزیر اعلیٰ یوگی آدتیہ ناتھ نے کہا کہ وندے ماترم ہندوستان کی تحریک آزادی کا ایک لافانی منتر بن گیا تھا۔ اس دوران غیر ملکی حکمرانوں کی طرف سے ڈھائے جانے والے بے شمار ظلم و ستم کے باوجود مجاہدین آزادی اور انقلابیوں نے اس گیت کے ساتھ گاوں گاوں میں پربھات پھیری کے ذریعہ شامل ہوکر بیداری پھیلائی۔

وزیر اعلیٰ نے کہا کہ 1875 میں تیار کیا گیا یہگیت تحریک آزادی کو آگے بڑھانے میں مددگار رہا۔ یہ کسی خاص طبقے کی تعریف نہیں کرتا۔ وندے ماترم پوری قوم کو متحد کرنے کا منتر بن گیا۔ 1905 میں جب بنگال کی تقسیم کی صورت میں ہندوستان کے بازو کاٹنے کی کوشش کی گئی تو انقلابیوں کے منہ سے صرف وندے ماترم ہی نکلا۔ وندے ماترم پورے ہندوستان کو متحد کرنے کا منتر بن گیا۔ یہ صرف ایک گیت نہیں ہے، بلکہ اس نے ہندوستان کو ایک نئی سمت دینے، ملک کے اجتماعی شعور کو آگے بڑھانے اور قوم پرستی کے جذبات کو ابھارنے میں مدد کی ہے۔ وندے ماترم ہم سب کو اپنے فرائض پر اصرار کرتا ہے۔

بنکم چندر چٹرجی کو خراج عقیدت پیش کرتے ہوئے یوگی آدتیہ ناتھ نے کہا کہ وندے ماترم انقلابیوں کی طاقت تھی۔ وندے ماترم ایک طاقتور نعرہ ہے۔ وندے ماترم ہمارا فخر ہے، ہمارے ملک کی پہچان ہے۔ اس گیت نے ہندوستان کو متحد کیا ہے۔

آڈیٹوریم میں موجود سبھی نے مل کر بلند آواز میں وندے ماترم گایا۔ اس موقع پر چیف سکریٹری ایس پی گوئل، پرنسپل سکریٹری داخلہ سنجے پرساد، ڈائرکٹر جنرل آف پولیس راجیو کرشنا اور بڑی تعداد میں افسران موجود تھے۔

ہندوستھان سماچار

ہندوستان سماچار / محمد شہزاد