جموں وکشمیر پولیس نے منشیات اسمگلر کی جائیداد کو ضبط کیا

جموں، 7 نومبر (ہ س)۔ جموں و کشمیر پولیس نے منشیات کی اسمگلنگ کے خلاف جاری مہم کے تحت ضلع سانبہ میں ایک بڑے منشیات فروش کی 53 لاکھ روپے مالیت کی جائیداد ضبط کر لی۔ پولیس کے مطابق ضبط شدہ اثاثوں میں ایک یک منزلہ رہائشی مکان اور مویشیوں کا شیڈ شامل ہے، جو محمد بارو ولد غلام نبی سکمہ لاسوارہ بشہ کی ملکیت ہے۔ وہ اس وقت بڑی برہمنہ میں رہائش پذیر ہے۔

یہ کارروائی نارکوٹک ڈرگس اینڈ سائیکو ٹروپک سبسٹنسز ایکٹ کے تحت کی گئی، جو بڑی برہمنہ پولیس اسٹیشن میں درج مقدمات سے منسلک ہے۔ تفتیش کے دوران پولیس نے ملزم کے قبضے سے 16 لاکھ 58 ہزار 660 روپے نقدی بھی برآمد کی۔ پولیس کے مطابق، منشیات کی اسمگلنگ سے حاصل کی گئی غیر قانونی دولت سے خریدی گئی جائیداد اور برآمد شدہ نقدی کی مجموعی مالیت تقریباً 70 لاکھ روپے بنتی ہے۔

محمد بارو ایک بدنامِ زمانہ اور عادی مجرم بتایا گیا ہے، جو 12 سے زائد مقدمات میں ملوث ہے، جن میں تین منشیات سے متعلق کیس اس وقت ضلع سانبہ اور جموں میں زیرِ سماعت ہیں۔پولیس حکام کے مطابق یہ کارروائی منشیات کے قلع قمع کے لیے جاری مہم کو مزید تقویت دینے کی عکاسی کرتی ہے۔

ہندوستھان سماچار

---------------

ہندوستان سماچار / محمد اصغر