ایلن مسک کو ٹیسلا سے ایک ٹریلین ڈالر مالیت کے شیئر ملیں گے
واشنگٹن، 7 نومبر (ہ س)۔ ٹیسلا کے شیئر ہولڈرز نے جمعرات کو کمپنی کے چیف ایگزیکٹیو آفیسر ایلن مسک کو تقریباً ایک ٹریلین ڈالر مالیت کے شیئر دینے کے منصوبے کی منظوری دے دی۔ اب مسک دنیا کے پہلے کھرب پتی بن سکتے ہیں۔ ٹیکساس کے آسٹن میں قائم ٹیسلا کے کیمپس میں شیئر ہولڈرز اس بات پر متفق ہوئے کہ اگر ان کی قیادت میں کمپنی آئندہ دہائی میں اپنے بلند مالی اور عملی اہداف حاصل کر لیتی ہے، تو انہیں تقریباً ایک ٹریلین ڈالر مالیت کے شیئر دیے جائیں گے۔
دی نیویارک ٹائمز کی رپورٹ کے مطابق، یہ فیصلہ 2018 میں منظور شدہ ایک سابقہ تنخواہی منصوبے کی طرز پر ہے۔ شیئر ہولڈرز کی تازہ منظوری کے مطابق 12 مرحلوں پر مشتمل منصوبے میں کمپنی کے چیف ایگزیکٹیو آفیسر ایلن مسک سے کہا گیا ہے کہ وہ ٹیسلا کی مارکیٹ ویلیو کو تقریباً 1.4 ٹریلین ڈالر سے بڑھا کر 8.5 ٹریلین ڈالر تک پہنچائیں اور دیگر کئی اہداف حاصل کریں۔ ان میں انسانی خصوصیات والے 10 لاکھ روبوٹس کی فروخت اور کمپنی کے خودکار سافٹ ویئر کے لیے 10 لاکھ ادائیگی شدہ سبسکرپشنز شامل ہیں۔
مسک نے شیئر ہولڈرز کا شکریہ ادا کرتے ہوئے کہا، ’’ہم جس سمت میں آگے بڑھ رہے ہیں، وہ نہ صرف ٹیسلا کے مستقبل کا ایک نیا باب ہے بلکہ ایک بالکل نئی کتاب ہے۔‘‘
فلوریڈا اسٹیٹ بورڈ آف ایڈمنسٹریشن نے ایک سیکورٹی فائلنگ میں مسک کے تنخواہی منصوبے کی حمایت کی وجہ بیان کرتے ہوئے کہا، ’’جو لوگ اس منصوبے کو بہت بڑا قرار دے رہے ہیں، وہ اس اہمیت کے حامل موقع کو نظر انداز کر رہے ہیں جس نے تاریخی طور پر ٹیسلا کی ترقی کو متعارف کرایا ہے۔ ایک ایسی کمپنی جو دیوالیہ ہونے کے دہانے سے نکل کر اسی طرح کے ڈھانچے کے تحت برقی گاڑیوں اور صاف توانائی کے میدان میں عالمی قیادت تک پہنچی ہے، اس نے ایسے ترغیبی ماڈل اپنانے کا حق حاصل کر لیا ہے جو غیر معمولی کارکردگی کو انعام دیتے ہیں۔‘‘
فنڈ مینیجر کیتھی ووڈ نے ایکس پر کہا کہ یہ منصوبہ اس طرح تیار کیا گیا ہے کہ اگر مسک منافع کماتے ہیں تو کمپنی کے سرمایہ کار بھی فائدہ حاصل کریں گے۔
آرک انویسٹ کی چیف ایگزیکٹیو آفیسر، محترمہ ووڈ نے لکھا، ’’اگر ایلن اور ان کی ٹیم اتنے بلند اہداف حاصل کر لیں، تو انہیں اور ان کے گاہکوں دونوں کو بڑا فائدہ پہنچے گا۔‘‘
فی الحال مسک کے پاس ٹیسلا کے تقریباً 15 فیصد شیئر ہیں۔ اگر وہ تنخواہی منصوبے کی شرائط پوری کر لیتے ہیں تو ان کا کنٹرول تقریباً 29 فیصد تک بڑھ سکتا ہے، تاہم انہیں ٹیکس کی ادائیگی کے لیے کچھ شیئر فروخت کرنے پڑ سکتے ہیں۔
شیئر ہولڈرز کے فیصلے پر تنقید بھی شروع ہو گئی ہے۔ لندن بزنس اسکول میں تنظیمی رویے کے پروفیسر رینڈل پیٹرسن نے کہا، ’’جو لوگ اس سب کے بعد بھی شیئر ہولڈر بنے ہوئے ہیں، وہ وہی لوگ ہیں جنہوں نے ایلن کول ایڈ کا نشہ کیا ہے۔‘‘
ہندوستھان سماچار
---------------
ہندوستان سماچار / انظر حسن
