سلی گوڑی، 5 نومبر (ہ س)۔ شمالی بنگال کے دورے پر گئے الیکشن کمیشن آف انڈیا (ای سی آئی) کی تین رکنی ٹیم بدھ کی شام باگڈوگرا پہنچی۔

اطلاعات کے مطابق، ای سی آئی کی ایک تین رکنی ٹیم کل سے 8 نومبر تک شمالی بنگال کا دورہ کرے گی تاکہ انتخابی فہرستوں کے خصوصی نظر ثانی (ایس آئی آر) کی نگرانی کرے۔ ڈپٹی الیکشن کمشنر گیانیش بھارتی، پرنسپل سکریٹری ایس بی جوشی اور ڈپٹی سکریٹری ابھینو اگروال کی قیادت میں ٹیم کوچ بہار، علی پور دوار اور جلپائی گوڑی اضلاع میں ووٹر لسٹ پر نظر ثانی کی پیش رفت کا جائزہ لے گی۔ بنگلہ دیش کی سرحد سے متصل ان اضلاع کو انتخابی عمل کی شفافیت کو یقینی بنانے کے لیے ای سی آئی ٹیم کے معائنہ کے لیے منتخب کیا گیا ہے۔

اپنے دورے کے دوران، ٹیم علاقہ وار جائزہ لے گی اور بوتھ لیول آفیسرز (بی ایل او) کے کام کا معائنہ کرے گی، جو گھر گھر ووٹروں کی تصدیق کے ذمہ دار ہیں۔ چیف الیکٹورل آفیسر منوج اگروال بھی ٹیم کے ساتھ نظرثانی کے عمل میں سہولت فراہم کریں گے۔

اطلاعات کے مطابق، ٹیم کل علی پور دوار ضلع میں انتخاب سے متعلق بات چیت کرے گی اور ساتھ ہی سرحدی علاقوں کا بھی دورہ کرے گی۔ علی پور دوار کے بعد ٹیم کوچ بہار، جلپائی گوڑی اور سلی گوڑی کا بھی دورہ کرے گی۔

---------------

ہندوستان سماچار / عبدالسلام صدیقی