نئی دہلی، 23 نومبر (ہ س) ۔

وزیر اعظم نریندر مودی نے آج جنوبی افریقہ کے جوہانسبرگ میں ہندوستان، برازیل اور جنوبی افریقہ (آئی بی ایس اے) ڈائیلاگ فورم کی میٹنگ میں شرکت کی۔ وزیر اعظم نے انسانیت پر مرکوز ترقی کو مضبوط بنانے میں ٹیکنالوجی کے ضروری کردار پر زور دیا اورآئی بی ایس اے ڈیجیٹل انوویشن الائنس کے قیام کی تجویز پیش کی۔

انہوں نے کہا کہ اس سے ڈیجیٹل پبلک انفراسٹرکچر جیسے یو پی آئی ، کو ون جیسے ہیلتھ پلیٹ فارمز، سائبرسیکیوریٹی فریم ورکس، اور تینوں ممالک کے درمیان خواتین کی زیرقیادت ٹیکنالوجی کے اقدامات کے اشتراک میں سہولت ہوگی۔ 40 ممالک میں امدادی پروجیکٹوں میں آئی بی ایس اے فنڈ کے کام کی تعریف کرتے ہوئے، وزیر اعظم نے جنوب-جنوب تعاون کو مزید آگے بڑھانے کے لیے آب و ہوا سے لچکدار زراعت کے لیے آئی بی ایس اے فنڈ کی تجویز پیش کی۔

وزیراعظم نے اس بات پر زور دیا کہ عالمی طرز حکمرانی سے وابستہ ادارے 21ویں صدی کی حقیقتوں سے بہت دور ہیں۔ انہوں نے آئی بی ایس اے پر زور دیا کہ وہ ایک مضبوط پیغام بھیجے کہ یہ اصلاحات کے لیے ضروری ہیں۔ عالمی حکمرانی، خاص طور پر اقوام متحدہ کی سلامتی کونسل کے اندر، اب کوئی آپشن نہیں بلکہ ضرورت ہے۔ انسداد دہشت گردی پر وزیر اعظم نے قریبی رابطہ کاری کی ضرورت پر زور دیا اور کہا کہ دہشت گردی کے خلاف جنگ میں دوہرے معیار کی کوئی گنجائش نہیں ہونی چاہیے۔

وزیر اعظم نے محفوظ، قابل بھروسہ، اور انسانی مرکز پر مبنی اے آئی اصولوں کی ترقی میں تعاون کرنے کے لیےآئی بی ایس اے کی صلاحیت کو بھی اجاگر کیا۔ انہوں نے آئی بی ایس اے کے رہنماو¿ں کو اگلے سال ہندوستان میں منعقد ہونے والی اے آئی امپیکٹ سمٹ میں مدعو کیا۔ وزیر اعظم نے کہا کہ آئی بی ایس اے ایک دوسرے کی ترقی کی تکمیل کر سکتا ہے اور پائیدار ترقی کے لیے ایک مثال کے طور پر کام کر سکتا ہے۔ انہوں نے موٹے اناج، قدرتی کاشتکاری، آفات سے نمٹنے، سبز توانائی، روایتی ادویات اور صحت کی حفاظت جیسے شعبوں میں تعاون کے مواقع پر روشنی ڈالی۔

وزیر اعظم نے اس بات پر زور دیا کہ آئی بی ایس اے صرف تین ممالک کا گروپ نہیں ہے بلکہ تین براعظموں کی تین بڑی جمہوریتوں اور تین بڑی معیشتوں کو جوڑنے والا ایک اہم پلیٹ فارم ہے۔ وزیراعظم نے افریقی سرزمین پر جی-20 کے پہلے سربراہی اجلاس کے ساتھ ہونے والی ملاقات کو سراہا۔ انہوں نے کہا کہ جی-20 کے نتیجے میں انسانی مرکز ترقی، کثیر جہتی تبدیلی اور پائیدار ترقی پر توجہ مرکوز کرنے والے اہم اقدامات سامنے آئے ہیں۔

اس اجلاس کی میزبانی جنوبی افریقہ کے صدر سیرل رامافوسا نے کی تھی اور وزیر اعظم مودی کے ساتھ برازیل کے صدر لوئیز اناسیو لولا دا سلوا بھی شامل تھے۔

ہندوستھان سماچار

ہندوستان سماچار / عطاءاللہ