ممبئی ، 22 نومبر (ہ س)۔ ممبئی کے بلدیہ انتخابات کے پیش نظر اپوزیشن خیمے میں بڑی سیاسی حرکت دیکھنے میں آئی ہے، جہاں نیشنلسٹ کانگریس پارٹی (ایس پی) کے سربراہ شرد پوار نے شیوسینا (یو بی ٹی) اور مہاراشٹر نو نرمان سینا (ایم این ایس) کے ساتھ مشترکہ طور پر میدان میں اترنے کی حمایت کر دی ہے۔ اس نئی صف بندی سے کانگریس ایک مشکل پوزیشن میں پہنچ گئی ہے اور بی ایم سی کی دوڑ میں اسے تنہائی کا سامنا کرنا پڑ سکتا ہے۔ہفتہ کو پارٹی عہدیداروں کے ساتھ میٹنگ میں شرد پوار نے واضح کیا کہ شیو سینا یو بی ٹی اور ایم این ایس کے ساتھ مل کر مقابلہ کرنا سیاسی طور پر زیادہ موثر ثابت ہوگا۔ انہوں نے ادھو ٹھاکرے اور راج ٹھاکرے دونوں کے ساتھ اتحاد کی وکالت کی ہے، ساتھ ہی کانگریس کو بھی مشورہ دیا ہے کہ وہ متحدہ کوشش کا حصہ بنے۔اہم ممبئی کانگریس کی صدر ورشا گائیکواڑ نے اس تجویز کو سختی سے رد کرتے ہوئے کہا کہ وہ ایسی جماعتوں کے ساتھ ہاتھ نہیں ملا سکتیں جو ’’تشدد پر یقین رکھتی ہوں یا قانون کو اپنی مرضی سے استعمال کرتی ہوں‘‘۔ اس موقف نے اپوزیشن کی صفوں میں واضح دراڑ پیدا کر دی ہے۔این سی پی–ایس پی کی ایگزیکٹو میٹنگ میں رہنماؤں نے متفقہ طور پر ٹھاکرے برادران کے گروپوں کے ساتھ اتحاد میں انتخابات لڑنے کا فیصلہ کیا۔ شرد پوار نے یہ بھی کہا کہ وہ کانگریس کے سینئر لیڈروں سے بات کریں گے، تاہم موجودہ صورتِ حال سے لگتا ہے کہ کانگریس اس صف بندی کا حصہ بننے پر آمادہ نہیں۔شیو سینا یو بی ٹی کے رہنما سنجے راوت نے اعلان کیا کہ ان کی پارٹی ایم این ایس کے ساتھ مفاہمت تک پہنچ چکی ہے اور کانگریس کے ساتھ مذاکرات مرکزی سطح پر جاری رہیں گے۔ ان کے مطابق مناسب وقت پر کانگریس بھی اس میں شامل ہو سکتی ہے۔ایم این ایس کے جنرل سکریٹری سندیپ دیشپانڈے نے دعویٰ کیا کہ پارٹی نے رسمی اتحاد کی کوئی پیشکش نہیں کی، لیکن انہوں نے کہا کہ مہاراشٹر میں کانگریس قائدین اختیاری قوت سے محروم ہیں اور راج ٹھاکرے ہی جماعت کا حتمی موقف بیان کریں گے۔

ورشا گائیکواڑ نے اپنی ضد برقرار رکھتے ہوئے کہا ہے کہ وہ ممبئی میں ایم این ایس کے ساتھ کسی سیاسی اشتراک کے حق میں نہیں، جس کے باعث کانگریس بی ایم سی انتخابات میں اکیلے لڑتی نظر آ سکتی ہے۔ یہ صورتحال اس وقت سامنے آئی ہے جب چند روز قبل کانگریس لیڈر وجے وڈیٹیوار نے ایم این ایس کے ساتھ تعاون کے امکان کو ایک عملی حکمت عملی قرار دیا تھا۔ گائیکواڑ کا کہنا ہے کہ وہ محض ممبئی کی سطح پر بات کر رہی ہیں، ریاست گیر فیصلے پارٹی کی اعلیٰ قیادت کرے گی۔

ہندوستھان سماچار

--------------------

ہندوستان سماچار / جاوید این اے