نئی دہلی، 22 نومبر (ہ س):۔

ایک بڑی کارروائی میں، دہلی پولیس کی کرائم برانچ نے پاکستان کی انٹیلی جنس ایجنسی، آئی ایس آئی کے تعاون سے ہتھیاروں کی اسمگلنگ کے ایک بین الاقوامی ماڈیول کا پردہ فاش کیا ہے۔ یہ گینگ ڈرون کے ذریعے جدید ترین غیر ملکی پستول پاکستان سے بھارت اسمگل کر رہا تھا۔ پولیس نے اس نیٹ ورک سے منسلک چار اہم اسمگلروں کو گرفتار کیا ہے اور ان کے قبضے سے 10 ہائی اینڈ سیمی آٹومیٹک پستول اور 92 زندہ کارتوس برآمد کیے ہیں۔ ان ہتھیاروں میں ایک پی ایکس-5.7 ترکی ساختہ پستول بھی شامل ہے جو خصوصی دستوں کے زیر استعمال ہے۔

کرائم برانچ کے ڈپٹی کمشنر آف پولیس سنجیو یادو نے ہفتہ کو بتایا کہ کرائم برانچ کو 19 نومبر کو اطلاع ملی کہ بین ریاستی ہتھیاروں کے اسمگلر غیر ملکی ہتھیاروں کی کھیپ پہنچانے کے لیے دہلی کے روہنی علاقے میں پہنچ رہے ہیں۔ اطلاع کی بنیاد پر انسپکٹر مان سنگھ اور انسپکٹر سندر گوتم کی قیادت میں ایک ٹیم نے روہنی کے سیکٹر 28 میں کھٹو شیام مندر کے پاس جال بچھا دیا۔ ایک سفید سوئفٹ ڈیزائر کار جائے وقوعہ پر پہنچی۔ تلاشی کے دوران کار کے اسپیکر باکس کے اندر چھپایا گیا ڈفیل بیگ برآمد ہوا جس میں آٹھ غیر ملکی پستول اور 84 زندہ کارتوس تھے۔

گرفتار ملزمان کی شناخت جالندھر کے رہنے والے منی دیپ سنگھ اور دلویندر کمار کے طور پر ہوئی ہے۔ پوچھ گچھ کے دوران، دونوں نے انکشاف کیا کہ وہ غیر ملکی ہینڈلرز کے ساتھ رابطے میں تھے اور ہندوستان بھر میں مختلف گروہوں کو ہتھیار فراہم کرتے تھے۔ ان کی اطلاع کی بنیاد پر گینگ کے مزید دو ارکان روہن تومر اور اجے عرف مونو کو گرفتار کیا گیا۔ ملزمان کے قبضے سے مزید دو پستول اور آٹھ کارتوس برآمد ہوئے۔

پاکستان سے ڈرون کے ذریعے سپلائی

تحقیقات میں انکشاف ہوا کہ ڈرون کے ذریعے پاکستان سے اسلحہ رات کے وقت ہندوستانی سرحد میں گرایا گیا۔ گینگ جی پی ایس لوکیشنز کی بنیاد پر پیکجز اٹھاتا تھا۔ ہتھیاروں کو کاربن پیپر میں لپیٹا گیا تھا تاکہ پتہ نہ لگ سکے۔ یہ گینگ سونو کھتری عرف راجیش کمار کے کہنے پر کام کرتا تھا جو اس وقت امریکہ میں مقیم غیر ملکی گینگسٹر ہے۔ اس کے ساتھی جسپریت جس نے آئی ایس آئی کے حمایت یافتہ ماڈیول سے ہتھیار خریدے۔

ہندوستھان سماچار

ہندوستان سماچار / عطاءاللہ