بیتیا، 21 نومبر (ہ س)۔ بہار کے انتخابی نتائج کے بعد جن سوراج لیڈرپرشانت کشور نے آج اپنا ایک روزہ انشن ختم کیا۔ اسکول کی لڑکیوں نے انہیں جوس پلایا۔ اس کے بعد انہوں نے میڈیا سے خطاب کیا۔میڈیا سے بات کرتے ہوئے پرشانت کشور نے کہا کہ مہا تما گاندھی کے خیالات اور رہنمائی سے متاثر ہو کر وہ ایک بار پھر بڑے پیمانے پر رسائی اور مواصلاتی مہم شروع کریں گے۔ انہوں نے کہا کہ 15 جنوری سے وہ بہار کے تمام 118,000 وارڈوں کا دورہ کر کے لوگوں سے براہ راست بات چیت کریں گے اور بہار نو نرمان سنکلپ ابھیان کے ذریعے حکومت کے وعدوں کی تکمیل کو یقینی بنائیں گے۔انتخابی نتائج پر ردعمل ظاہر کرتے ہوئے پرشانت کشور نے کہا کہ حالیہ نتائج جمہوریت کے ساتھ ناانصافی ہے۔ انہوں نے کہا کہ غریب خاندانوں کی ایک بڑی تعداد کو 10 ہزار روپے رشوت دی گئی جو کہ جمہوریت اور بابا صاحب کے بنائے ہوئے آئین کی بنیادی روح کی کھلی خلاف ورزی ہے۔پرشانت کشور نے کہا کہ اس طرح کے نتائج کو قبول کرنا مشکل ہے، اور یہ کہ جن سوراج لوگوں کی توقعات اور حقوق کے تحفظ کے لیے پوری طاقت کے ساتھ اپنا کردار ادا کرے گا۔پرشانت کشور نے آج ایک بڑا اعلان کرتے ہوئے کہا کہ وہ بہار نہیں چھوڑیں گے اور آئندہ پانچ سال تک اپنی آمدنی کا 90 فیصد جن سوراج کے کام میں عطیہ کریں گے۔ انہوں نے یہ بھی بتایا کہ گزشتہ 20 سالوں میں انہوں نے جو اثاثے حاصل کیے ہیں ان میں سے وہ صرف ایک گھر رکھیں گے اور باقی جن سوراج کو وقف کر دیں گے۔ انہوں نے کہا کہ جن سوراج کی جدوجہد محض سیاسی نہیں ہے بلکہ ایک اخلاقی اور سماجی تحریک ہے اور اس سے ان کی وابستگی مکمل ہے۔

ہندوستھان سماچار

ہندوستان سماچار / Mohammad Afzal Hassan