حیدرآباد ، 20 نومبر (ہ س)۔ تلنگانہ کے وزیر اعلیٰ یونت ریڈی نے مرکزی وزیرامورصارفین پرہلاد جوشی پرزوردیا کہ تلنگانہ میں راشن کارڈ پرغریبوں کو باریک چاول کی فراہمی کا مرکزی حکومت جائزہ لے تاکہ ملک بھر میں راشن کارڈ کے ذریعہ غریبوں کوباریک چاول کی فراہمی کو یقینی بنایاجاسکے۔انہوں نے کہا کہ ضرورت پڑنے پر اس موضوع پر تفصیلی مطالعہ کرکے مناسب فیصلہ کیا جانا چاہیے۔ریونت ریڈی کی تجویز پر ردعمل ظاہر کرتے ہوئے پرہلاد جوشی نے کہا کہ مکمل مطالعہ کے بعد ملک گیر سطح پر باریک چاول کی راشن کارڈس کے ذریعہ فراہمی کے امکان پر غور کیاجائے گا۔انہوں نے مرکزی وزیر سے کہا کہ تلنگانہ میں راشن کارڈ رکھنے والوں کو باریک چاول کی فراہمی کی ملک کی کسی اور ریاست میں نظیرنہیں ملتی۔وزیر اعلیٰ نے کہا کہ جب تک عوام کو وہی چاول نہ دیاجائے جو وہ روزمرہ استعمال کرتے ہیں، تب تک کسی بھی فلاحی اسکیم کا مقصد پورا نہیں ہوتا۔آج صبح وزیر اعلیٰ نے مرکزی وزیر پرہلاد جوشی سے ہوٹل تاج کرشنا میں ملاقات کی۔ اس موقع پر وزیر اعلیٰ نے تجویز پیش کی کہ جس طرح تلنگانہ میں سَنّا چاول تقسیم کیا جا رہا ہے، اسی طرز پر مرکزی حکومت بھی ملک بھر میں اس کے تقسیم کا جائزہ لے۔واضح رہے کہ تلنگانہ حکومت نے یکم اپریل 2024 سے راشن کارڈ رکھنے والوں کو باریک چاول کی تقسیم شروع کی ہے، جس کے تحت ہر مستحق فرد کو 6 کلو اعلیٰ معیار کاچاول فراہم کیاجارہا ہے۔ پسماندہ طبقات کو بہتر غذائیت پہنچانے کے مقصد سے، حکومت نے موٹے چاول کی جگہ معیاری باریک چاول تقسیم کرنے کا فیصلہ کیا ہے۔اس موقع پر وزیر اُتم کمار ریڈی، چیف سکریٹری کے راماکرشناراؤ، وزیر اعلیٰ کے پرنسپل سکریٹری شیشادری، سیول سپلائز کے پرنسپل سکریٹری اسٹیفن رویندر اور دیگر سینئر عہدیدار موجود تھے۔

ہندوستھان سماچار

ہندوستان سماچار / محمدعبدالخالق