حیدرآباد ، 20 نومبر (ہ س)۔تلنگانہ اسٹیٹ الیکشن کمیشن (ایس ای سی) مقامی ادارہ جات کے انتخابات کے شیڈول کے اعلان کے لیے پوری طرح تیار ہے۔ امکان ہے کہ پنچایت انتخابات 26 یا 27 نومبر کو منعقد کیے جائیں گے، جبکہ گرام پنچایت انتخابات تین مراحل میں 11، 14اور 17 دسمبرکوکرائے جائیں گے۔الیکشن کمیشن نے حال ہی میں تمام ضلع کلکٹروں کے ساتھ ویڈیو کانفرنس منعقد کی، جس میں انتخابی انتظامات کا جائزہ لیا گیا۔ کمیشن نے کلکٹروں کو ہدایت دی ہے کہ انتخابات انتہائی منظم، شفاف اور پرامن طریقے سے منعقد کیے جائیں۔

دوسری جانب، اسٹیٹ الیکشن کمیشن نے بدھ کے روز پنچایتوں میں ووٹر لسٹ کی نظرثانی کے شیڈول کا بھی اعلان کردیا ہے۔ نظرثانی کا عمل آج سے 23 نومبر تک جاری رہے گا۔20 نومبر کو ووٹروں کی درخواستیں، اعتراضات اور غلطیوں کی اصلاح قبول کی جائے گی، جبکہ 21 نومبر کو ان درخواستوں اور اعتراضات کی جانچ اور نمٹارہ کیا جائے گا۔کمیشن کے مطابق، نظرثانی شدہ ووٹر لسٹ اور پولنگ اسٹیشنوں کی تفصیلات 23 نومبر کو شائع کی جائیں گی۔اسٹیٹ الیکشن کمشنر رانی کُمودنی نے اس سلسلے میں تمام ضلع پنچایت عہدیداروں کو ضروری ہدایات جاری کر دی ہیں۔ادھر حکومت یکم سے 9 دسمبر تک پبلک ایڈمنسٹریشن ویک منانے کی تیاری کر رہی ہے۔ یہ بھی یاد رہے کہ وزیر اعلیٰ ریونت ریڈی نے حالیہ کابینہ اجلاس میں پنچایت انتخابات کرانے کا فیصلہ کیا تھا۔حکام کے مطابق،اگر پنچایت انتخابات 31 مارچ 2021 سے پہلے مکمل ہو جاتے ہیں، تو ریاست کو سنٹرل فنانس کمیشن سے فنڈز جاری ہونے کاامکان ہے، جس کی وجہ سے انتخابی عمل کو وقت پر مکمل کرنا ضروری سمجھاجارہا ہے۔

ہندوستھان سماچار

ہندوستان سماچار / محمدعبدالخالق