مدھیہ پردیش میں مذہبی سیاحت کو نئی پرواز : اندور سے اجین - اونکاریشور کے لیے شروع ہوئی پی ایم شری ہیلی ٹورزم سروس

۔ وزیر سلاوٹ نے رسمی افتتاح کیا، صرف 20 منٹ میں اندور سے اجین مہاکال درشن کے لیے عقیدت مند پہنچ گئے

اندور، 20 نومبر (ہ س)۔ وزیراعظم نریندر مودی کے مذہبی اور ثقافتی سیاحت کو مضبوط بنانے کے عزم کو آگے بڑھاتے ہوئے، وزیراعلیٰ ڈاکٹر موہن یادو کی اختراعی پہل پر جمعرات کو مدھیہ پردیش کے اندور شہر کو ایک تاریخی تحفہ ملا ہے۔ صوبے میں پہلی بار ’پی ایم شری‘ ہیلی ٹورزم سروس کا افتتاح عقیدت بھرے ماحول میں کیا گیا۔ سروس کے پہلے مرحلے میں اندور سے اجین واقع بابا مہاکالیشور جیوترلنگ اور اجین سے اونکاریشور تک ہیلی کاپٹر کے ذریعے مذہبی سفر کا آغاز ہوا۔

بچولی مردانہ واقع ہیلی پیڈ سے عقیدت اور جوش و خروش سے بھرے ماحول میں مسافروں کا پہلا گروہ روانہ ہوا۔ مسافروں کے پہلے گروہ کو آبی وسائل وزیر تلسی رام سلاوٹ نے ہری جھنڈی دکھا کر مہاکال کے شہر اجین کے لیے روانہ کیا۔ اس موقع پر وزیر سلاوٹ نے کہا کہ یہ سیاحت کی سروس مذہبی سیاحت کا نیا باب ہے۔ یہ سفر وزیراعظم نریندر مودی کے خوابوں کے مطابق صوبے میں مذہبی سیاحت کو مضبوط کرنے کی سمت میں ایک تاریخی قدم ہے۔ وزیراعلیٰ ڈاکٹر موہن یادو کی قیادت میں مدھیہ پردیش وہ پہلا صوبہ ہے، جس نے اس طرح کی مذہبی ہیلی کاپٹر سروس شروع کر کے ایک نئی مثال قائم کی ہے۔

وزیر سلاوٹ نے کہا کہ یہ سروس صوبے کے مذہب، ثقافت اور سیاحت کے شعبے کو نئی بلندیوں تک لے جانے میں سنگ میل ثابت ہوگی۔ اس سے مقامی سیاحت کو بھی فروغ ملے گا اور اندور- اجین کوریڈور پر اقتصادی سرگرمیوں میں اضافہ ہوگا۔ اس موقع پر ایڈیشنل کلکٹر روشن رائے سمیت ضلع انتظامیہ، پولیس اور سیاحت کے شعبے کے متعدد اہلکار موجود تھے۔ انتظامات کے حوالے سے انتظامیہ نے وسیع تیاریاں کی تھیں، جس سے پروگرام کا انعقاد ہموار اور کامیابی کے ساتھ ہوا۔

ہندوستھان سماچار

---------------

ہندوستان سماچار / انظر حسن