سات سالوں بعد معزز ٹرافی دوبارہ جامعہ کے نام

نئی دہلی، 20 نومبر (ہ س )۔

جامعہ ملیہ اسلامیہ (جے ایم آئی) کی اسٹاف کرکٹ ٹیم نے شاندار کارکردگی کا مظاہرہ کرتے ہوئے اکیسویں آل انڈیا وائس چانسلرز کرکٹ کپ ٹی-20 ٹورنامنٹ 2025 کا خطاب اپنے نام کر لیا۔ یہ ٹورنامنٹ لالہ لاجپت رائے یونیورسٹی آف ویٹرنری اینڈ اینیمل سائنسز، ہنسیار (ہریانہ) میں 6 سے 15 نومبر 2025 تک منعقد ہوا تھا۔

ٹورنامنٹ میں ملک کی مختلف یونیورسٹیوں کی چوبیس ٹیموں نے شرکت کی۔ جامعہ کی ٹیم نے پورے ٹورنامنٹ میں ناقابلِ شکست رہتے ہوئے فائنل میں یونیورسٹی آف جموں کو شکست دے کر ٹرافی اپنے نام کرلی۔ فائنل میں جامعہ نے تین وکٹوں سے کامیابی حاصل کی (اسکور: یونیورسٹی آف جموں 146/9، جامعہ 147/7)۔

جامعہ کی ٹیم اور کھلاڑیوں کی نمایاں کارکردگی:

• جامعہ کی ٹیم نے کل 8 میچ کھیلے اور تمام میچوں میں کامیابی حاصل کی۔

• ایک لیگ میچ 10 وکٹوں سے جیتا۔

• کوارٹر فائنل میں مضبوط حریف ایم ڈی یو روہتک کو بھی 10 وکٹوں سے شکست دی۔

• جناب محمد اخلاق (نائب کپتان، ٹیکنیکل اسسٹنٹ، سینٹر فار فزیوتھراپی) ٹورنامنٹ میں جامعہ کے سب سے بہتر کھلاڑی قرار پائے۔ انہوں نے 274 رنز اسکور کیا تھا۔

ہندوستھان سماچار

ہندوستان سماچار / Md Owais Owais