صوبے کے شہری علاقوں میں بے زمین خاندانوں کو رہائشی زمین کے پٹہ حقوق دینے کی مہم کا آغاز ہوا

بھوپال، 20 نومبر (ہ س)۔ مدھیہ پردیش میں ریاستی حکومت نے شہری علاقوں میں رہنے والے بے زمین اور رہائش سے محروم خاندانوں کو رہائشی زمین کے پٹہ حقوق دینے کے لیے جمعرات سے وسیع پیمانے پر مہم شروع کی ہے۔ شہری انتظامیہ و ترقیات کمشنر سنکیت بھونڈوے نے بتایا کہ یہ مہم 13 دسمبر 2025 تک جاری رہے گی۔ اس کے لیے محکمہ شہری ترقیات و رہائش اور محکمہ محصول نے مشترکہ ہدایات جاری کی ہیں۔

رابطہ عامہ افسر مکیش موڈی نے جمعرات کو معلومات دیتے ہوئے کہا کہ وزیراعظم رہائش اسکیم (شہری) 2.0 کے تحت بی ایل سی اور اے ایچ پی اجزاء کے موثر نفاذ کے لیے یہ اقدام انتہائی اہم ہے۔ ریاستی حکومت نے 1984 کے مدھیہ پردیش شہری علاقوں میں بے زمین افراد (پٹہ حقوق) ایکٹ میں ترمیم کرتے ہوئے اہلیت کی تاریخ 31 دسمبر 2020 مقرر کی ہے۔ اس تاریخ تک سرکاری، میونسپل کارپوریشن یا ترقیاتی اتھارٹی کی زمین پر حقیقی طور پر قابض ایسے رہائش سے محروم خاندان پٹہ حقوق کے اہل ہوں گے۔

ریاست کے تمام شہری علاقوں میں سروے کا کام 20 نومبر سے 13 دسمبر تک جاری رہے گا۔ فہرست 14 دسمبر کو شائع کی جائے گی۔ کسی بھی اعتراض یا مشورے کے حل کے بعد 29 دسمبر کو آخری فہرست متعلقہ ضلع کلکٹر کے ذریعہ جاری کی جائے گی۔ یہ فہرست متعلقہ ضلع دفتر کی ویب سائٹ اور محکمہ کی ویب سائٹ www.mpurban.gov.in پر بھی دستیاب ہوگی۔ ہر ضلع میں سروے ٹیمیں تشکیل دی جائیں گی، جن کے سربراہ محصول افسر ہوں گے اور سروے کے دوران آدھار ای کے وائی سی پر مبنی مجموعی شناخت لازمی ہوگی۔ شہری ترقیات کمشنر نے یہ بھی واضح کیا کہ سروے کا عمل شفاف اور مؤثر طریقے سے چلایا جائے گا۔ آخری فہرست جاری ہونے کے بعد اہل مستفیدین کو رہائشی زمین کے مستقل اور عارضی پٹے 4 جنوری 2026 سے 20 فروری 2026 کے درمیان فراہم کیے جائیں گے۔ مستقل پٹے سرخ رنگ میں اور عارضی پٹے پیلے رنگ میں دیے جائیں گے۔ جن علاقوں میں جھگی بستیاں دوسری جگہ منتقل کرنے کی ضرورت ہے، وہاں کمیٹی کے فیصلے کے مطابق مستفیدین کو متبادل مقام پر منتقل کیا جائے گا۔

ہندوستھان سماچار

--------------

ہندوستان سماچار / انظر حسن