ممبئی ، 20 نومبر (ہ س)۔ وزیر محصول چندر شیکھر باونکولے نے دعویٰ کیا ہے کہ نائب وزیر اعلیٰ ایکناتھ شندے اور بھارتیہ جنتا پارٹی کے درمیان کسی قسم کی ناراضگی موجود نہیں ہے۔ انہوں نے کہا کہ شندے کی مرکزی وزیر داخلہ امت شاہ سے ہونے والی ملاقات مکمل طور پر این ڈی اے کی روایت کے مطابق تھی اور اس میں شہری ترقیات کے محکمے کے امور پر تبادلہ خیال کیا گیا۔

باونکولے نے بتایا کہ حال ہی میں انہوں نے خود ایکناتھ شندے سے گفتگو کی ہے اور انہیں یقین ہے کہ شندے کی بی جے پی کے خلاف کوئی ناراضگی نہیں ہے۔ ان کا کہنا تھا کہ ’’این ڈی اے کے رہنما مرکزی قیادت سے براہ راست رابطے میں رہتے ہیں، اور شندے نے بھی اتحاد کے ایک ذمہ دار رہنما کی حیثیت سے شاہ سے ملاقات کی۔‘‘

انہوں نے کہا کہ مہایوتی کوآرڈینیشن کمیٹی نے یہ طے کیا ہے کہ اتحادی جماعتوں کے لیڈروں کا ایک دوسرے کے دھڑوں میں جانا ممنوع ہوگا۔ باونکولے کے مطابق، ’’اس کے بعد کسی بھی اتحادی پارٹی کا لیڈر اتحاد کے دوسرے جزو میں شامل نہیں ہو سکتا۔‘‘ انہوں نے مزید کہا کہ انتخابات کے دوران ایسے رہنما جو ٹکٹ سے محروم رہ جائیں، اکثر دوسری جگہ مواقع تلاش کرتے ہیں، اور ان کے حلقے میں بھی کچھ بی جے پی لیڈر شندے گروپ میں شامل ہوئے تھے، جو غیر معمولی نہیں ہے۔

انہوں نے یہ بھی کہا کہ اگرچہ شندے گروپ کے وزراء نے ’’آپریشن لوٹس‘‘ کے مبینہ خدشات کے سبب کابینہ میٹنگ کا بائیکاٹ کیا تھا، مگر رویندر چوہان پر باغی لیڈروں کو مالی مدد دینے کے الزامات درست نہیں ہیں۔ باونکولے نے واضح کیا کہ شندے اور بی جے پی کے درمیان تعلقات سازگار ہیں اور کسی قسم کا داخلی اختلاف موجود نہیں۔

ہندوستھان سماچار

ہندوستان سماچار / جاوید این اے