نکسلی تصادم میں شہید مدھیہ پردیش کے ہاک فورس انسپکٹر آشیش شرما کی سرکاری اعزاز کے ساتھ آخری رسومات ادا کی گئیں

۔ وزیراعلیٰ نے شہید کے چھوٹے بھائی کو ایس آئی کی نوکری اور خاندان کو ایک کروڑ روپے دینے کا اعلان کیا

بھوپال، 20 نومبر (ہ س)۔ چھتیس گڑھ میں نکسلیوں کے خلاف مشترکہ مہم میں بہادری سے مقابلہ کرتے ہوئے جان دینے والے مدھیہ پردیش کے بالاگھاٹ میں تعینات ہاک فورس کے انسپکٹر آشیش شرما کی جمعرات کو ان کے آبائی گاوں نرسنگھ پور ضلع کے گاوں بوہانی میں سرکاری اعزاز کے ساتھ آخری رسومات ادا کی گئیں۔

رشتہ داروں نے ان کی میت کو مکھ اگنی دی۔ وزیراعلیٰ ڈاکٹر موہن یادو اور پنچایت و دیہی ترقیات وزیر پرہلاد سنگھ پٹیل نے انہیں کندھا دیا۔ وزیراعلیٰ ڈاکٹر یادو نے اس موقع پر شہید آشیش شرما کے چھوٹے بھائی کو سب انسپکٹر بنانے کا اعلان کیا۔ انہوں نے کہا کہ تمام قواعد کو نرم کرتے ہوئے چھوٹے بھائی کو ایس آئی بنایا جائے گا۔ اس کے ساتھ ہی خاندان کو ایک کروڑ روپے کی اعزازی رقم دی جائے گی اور آشیش شرما کے نام پر گاوں میں ایک پارک اور اسٹیڈیم بنایا جائے گا۔

قابل ذکر ہے کہ ہاک فورس کے انسپکٹر آشیش شرما بدھ کو چھتیس گڑھ کے بورتلاو-کریجھر کے گھنے جنگلات میں نکسلی مخالف مہم اور تصادم کے دوران بہادری کے ساتھ شہید ہو گئے تھے۔ مدھیہ پردیش، چھتیس گڑھ اور مہاراشٹر کی مشترکہ ٹیم کے اس اہم آپریشن میں انہوں نے لافانی حوصلہ اور غیر معمولی قیادت کا مظاہرہ کیا۔ اینٹی نکسلی آپریشن کے ڈی جی پنکج شریواستو نے بتایا کہ بدھ کو مدھیہ پردیش، مہاراشٹر اور چھتیس گڑھ نے مشترکہ آپریشن کیا تھا۔ تینوں ریاستوں کے سرحدی علاقے بور تالاب کے پاس نکسلیوں کے چھپے ہونے کی اطلاع ملی تھی۔ پولیس کے پہنچنے پر نکسلیوں سے جھڑپ ہو گئی۔ تینوں ٹیم کی قیادت کر رہے انسپکٹر آشیش شرما کو گولی لگی۔ انہیں زخمی حالت میں اسپتال لے جایا گیا، جہاں ڈاکٹروں نے انہیں مردہ قرار دیا۔

جمعرات دوپہر کو شہید آشیش شرما کی میت کو نرسنگھ پور میں ان کے آبائی گاوں بوہانی لایا گیا۔ گھر میں انہیں گارڈ آف آنر دیا گیا۔ اس کے بعد آخری رسومات کے لیے ان کی میت کو مکتی دھام لے جایا گیا۔ لوگوں نے گھروں کی چھتوں پر کھڑے ہو کر شہید پر پھول برسائے۔ شہید کے آخری سفر میں شامل ہونے کے لیے کیبنٹ وزیر پرہلاد سنگھ پٹیل اور اودے پرتاپ سنگھ پہنچے۔ مدھیہ پردیش کانگریس کے صوبائی صدر جیتو پتواڑی، لیڈر آف اپوزیشن اُمنگ سنگھار نے بھی شہید جوان کو خراج عقیدت پیش کیا۔

ہندوستھان سماچار

---------------

ہندوستان سماچار / انظر حسن