نئی دہلی، 19 نومبر (ہ س)۔

ٹیلی کمیونیکیشن انجینئرنگ سینٹر (ٹی ای سی) اور اندر پرستھ انسٹی ٹیوٹ آف انفارمیشن ٹیکنالوجی، دہلی (آئی آئی آئی ٹی-دہلی) نے بدھ کو ملک میں ابھرتی ہوئی ٹیلی کمیونیکیشن ٹیکنالوجیز کی تحقیق اور نئے معیارات اور ٹیسٹ فریم ورک تیار کرنے کے لیے ایک معاہدے پر دستخط کیے ہیں۔ معاہدے کا مقصد مستقبل کی ٹیکنالوجیز جیسے کہ 6جی، آپٹیکل کمیونیکیشن، غیر زمینی نیٹ ورکس پر مطالعہ کو فروغ دینا اور بین الاقوامی معیار سازی کے فورمز میں ہندوستان کی شرکت کو مضبوط بنانا ہے۔

مرکزی وزارت مواصلات کے مطابق، معاہدے پر راکیش دیسائی، ڈی ڈی جی (فکسڈ ایکسیس)، ٹی ای سی، اور ڈاکٹر ابھیجیت مترا، اسسٹنٹ پروفیسر، آئی آئی آئی ٹی- دہلی نے دستخط کیے ۔ اس موقع پر آئی آئی آئی ٹی دہلی کے ڈائریکٹر پروفیسر رنجن بوس، ٹی ای سی کے ڈی ڈی جی (ایڈمنسٹریشن)، پون گپتا، اور پروفیسر وویک اشوک بوہرا بھی موجود تھے۔

دونوں ادارے اب اے آئی پر مبنی نیٹ ورک کی بہتری، غلطیوں کا پتہ لگانے، ٹریفک مینجمنٹ اور نیٹ ورک کے اصولوں کے نفاذ جیسے شعبوں میں تعاون کریں گے۔ تحقیق کو 5جی اور 6جی ٹیکنالوجیز، mmWave، mMIMO، اور الگ الگ نیٹ ورکس پر بھی آگے بڑھایا جائے گا۔ فری اسپیس آپٹیکل کمیونیکیشن اور لی فائی ٹیکنالوجیز پر بھی مشترکہ مطالعہ کیا جائے گا، جو دیہی علاقوں اور دفاعی شعبوں میں تیز رفتار اور محفوظ رابطہ فراہم کر سکتی ہیں۔یہ معاہدہ ملک میں مقامی ٹیلی کام ٹیکنالوجیز کی ترقی کو فروغ دے گا، عالمی معیار سازی کے عمل میں ہندوستان کے کردار کو مضبوط کرے گا اور آتمنربھر بھارت کے ہدف کو آگے بڑھانے میں معاون ہوگا۔

ہندوستھان سماچار

ہندوستان سماچار / عطاءاللہ