بھوپال، 16 نومبر (ہ س)۔

کبھی ’بیمارو ریاست‘ اور ترقی کی دوڑ میں پسماندہ سمجھے جانے والا مدھیہ پردیش آج خود انحصاری، زرعی خوشحالی اور تیز اقتصادی ترقی کی علامت بن چکا ہے۔ مدھیہ پردیش اب نہ صرف شرحِ ترقی میں پیش پیش ہے بلکہ غذائی اجناس کی پیداوار میں بھی ملک میں نئی شناخت بنا چکا ہے۔ یہی وجہ ہے کہ ہندوستان کا دل کہلانے والا یہ صوبہ اب ملک کا نیا ’فوڈ باسکٹ‘ کہلانے لگا ہے۔

یہ تبدیلی وزیراعلیٰ ڈاکٹر موہن یادو کی دور اندیش قیادت، حکومت کی منظم پالیسیوں اور کسانوں کی انتھک محنت کا نتیجہ ہے۔ وزیراعلیٰ نے اتوار کو ایک بیان میں کہا کہ مدھیہ پردیش نے زرعی شعبے اور اس سے متعلق میدانوں میں جو غیر متوقع ترقی کی ہے، اس میں ہمارے اَنّ داتاؤں (کاشتکاروں) کا اہم کردار ہے۔ گزشتہ برسوں میں مدھیہ پردیش نے زرعی پیداوار، آبپاشی کے دائرے میں توسیع اور کسانوں کی آمدنی میں اضافہ جیسے شعبوں میں قابلِ ذکر کامیابیاں حاصل کر کے ملک کا نیا ’فوڈ باسکٹ‘ بننے کا اعزاز حاصل کیا ہے۔

وزیراعلیٰ ڈاکٹر یادو نے کہا کہ ریاست کی شرحِ ترقی اب ڈبل ڈیجٹ تک پہنچ چکی ہے، جس میں زراعت اور اس سے وابستہ شعبوں کا سب سے بڑا حصہ ہے۔ انہوں نے کہا کہ ہماری حکومت نے کھیتی کو منافع بخش کاروبار بنانے کا عزم کیا ہے۔ آبپاشی کی سہولیات میں توسیع، مناسب بجلی سپلائی، ایم ایس پی پر خریداری، بھاوانتر ادائیگی اسکیم اور زرعی مشینی کاری نے کسانوں کی زندگی میں خوشحالی لانے میں اہم کردار ادا کیا ہے۔ انہوں نے بتایا کہ آج مدھیہ پردیش گیہوں، چنا، مسور، سویا بین اور تلہن کی پیداوار میں ملک میں سب سے آگے ہے۔ پنجاب اور ہریانہ جیسے روایتی طور پر زراعت میں خوشحال صوبوں کو کئی فصلوں کی پیداوار میں پیچھے چھوڑ دینا ریاست کے کسانوں کی محنت اور حکومت کی حساس پالیسیوں کا نتیجہ ہے۔

انہوں نے کہا کہ زراعت کے ساتھ ساتھ ڈیری، مویشی پروری، ماہی پروری اور فوڈ پروسیسنگ کے شعبوں میں بھی ریاست نے نئی بلندیاں حاصل کی ہیں۔ ون ڈسٹرکٹ ون پروڈکٹ (او ڈی او پی)، ایگرو اینڈ فوڈ پروسیسنگ یونٹس اور کولڈ اسٹوریج چین جیسے متعدد اقدامات کسانوں کو ان کی پیداوار کا بہتر دام دلانے میں مددگار ثابت ہو رہے ہیں۔ ہمارا مقصد بالکل واضح ہے—ہر کھیت تک پانی، ہر کسان تک ترقی اور ہر گھر تک خوشحالی۔ مدھیہ پردیش کا کسان اب صرف اَنّ داتا نہیں، بلکہ غذائی اجناس کی پیداوار میں خود انحصار ہندوستان کی تعمیر کا اہم کردار بن چکا ہے۔

وزیراعلیٰ ڈاکٹر یادو نے کسانوں، زرعی ماہرین اور ریاست کے پورے زرعی عملے کو اس قومی کامیابی کی سمت آگے بڑھنے پر مبارک باد دی ہے۔ انہوں نے کہا کہ آنے والے برسوں میں مدھیہ پردیش نہ صرف ملک کی غذائی تحفظ کو مضبوط کرے گا، بلکہ عالمی زرعی نقشے پر بھی اپنی منفرد پہچان قائم کرے گا۔

ہندوستھان سماچار

ہندوستان سماچار / انظر حسن